duri

mujhe maut ā.egī, mar jā.ūñgā maiñ,

tujhe maut ā.egī, mar jā.egī tuu,

vo pahlī shab-e-mah shab-e-māh-e-do-nīm ban jā.egī

jis tarah sāz-kohnā ke tār-e-shikastā ke donoñ sire

duur ufuq ke kināroñ ke mānind

bas duur hī duur se thartharāte haiñ aur paas aate nahīñ haiñ

na vo raaz kī baat hoñToñ pe laate haiñ

jis ne muġhannī ko daur-e-zamāñ-o-makāñ se nikālā thaa,

baḳhshī thī ḳhvāb-e-abad se rihā.ī!

ye sach hai to phir kyuuñ

koī aisī sūrat, koī aisā hiila na thā

jis se ham aane vaale zamāne kī aahaT ko sun kar

vahīñ us kī yūrish ko sapnoñ pe yuuñ rok lete

ke ham terī manzil nahīñ, terā maljā o maavā nahīñ haiñ?

ye sochā thā shāyad

ke ḳhud pahle is bod ke āfrīnda ban jā.eñge

ab jo ik bahr-e-ḳhamiyāza-kash ban gayā hai!

to phir az-sar-e-nau masarrat se, nau-ras na.ī fātehāna masarrat se

pā.eñge bhūlī huī zindagī ko

vahī ḳhud-farebī, vahī ashk-shoī kā adnā bahānā!

magar ab vahī bod sargoshiyāñ kar rahā hai

ke tū apnī manzil ko vāpas nahīñ jā sakegā,

nahīñ jā sakegā

mujhe maut ā.egī, mar jā.ūñgā maiñ,

tujhe maut ā.egī, mar jā.ūñgā maiñ,

tujhe maut ā.egī, mar jā.egī tuu,

ye ifrīt pahle hazīmat uThā.egā, miT jā.egā!

mujhe maut aaegi, mar jaunga main,

tujhe maut aaegi, mar jaegi tu,

wo pahli shab-e-mah shab-e-mah-e-do-nim ban jaegi

jis tarah saz-kohna ke tar-e-shikasta ke donon sire

dur ufuq ke kinaron ke manind

bas dur hi dur se thartharaate hain aur pas aate nahin hain

na wo raaz ki baat honTon pe late hain

jis ne mughanni ko daur-e-zaman-o-makan se nikala tha,

baKHshi thi KHwab-e-abad se rihai!

ye sach hai to phir kyun

koi aisi surat, koi aisa hila na tha

jis se hum aane wale zamane ki aahaT ko sun kar

wahin us ki yurish ko sapnon pe yun rok lete

ke hum teri manzil nahin, tera malja o mawa nahin hain?

ye socha tha shayad

ke KHud pahle is bod ke aafrinda ban jaenge

ab jo ek bahr-e-KHamiyaza-kash ban gaya hai!

to phir az-sar-e-nau masarrat se, nau-ras nai fatehana masarrat se

paenge bhuli hui zindagi ko

wahi KHud-farebi, wahi ashk-shoi ka adna bahana!

magar ab wahi bod sargoshiyan kar raha hai

ke tu apni manzil ko wapas nahin ja sakega,

nahin ja sakega

mujhe maut aaegi, mar jaunga main,

tujhe maut aaegi, mar jaunga main,

tujhe maut aaegi, mar jaegi tu,

ye ifrit pahle hazimat uThaega, miT jaega!