nowember se december tak part 2

december aa gayā jānāñ

vahī kāġhaz kā TukḌā

ab bhī mere haath meñ hī hai

jo pal pal mujh ko

us vīrān sannāTe kī jānib khīñch letā hai

abhī bhī dhuup meñ bāhar nikalne

par ajab sī koft hotī hai

maiñ apne naam ke a se

bhī aage aa chukā huuñ ab

aur ab ye sochtā huuñ

kyā karūñgā in kitāboñ kā

jo tum ne chhoḌ dī thiiñ

biich meñ hī mujh ko paḌhne ko

baḌā māyūs hai nietzsche

baḌā hairān hai kaamū

tumhāre lauT jaane se

bahut vīrān apnā campus hai

yaar dekho tum

vahāñ ke phuul kyā ab bhī

khile aur khil rahe hoñge

vahāñ kī shaam kyā ab bhī

tumhārī muntazir hogī

chalo ye sab yahīñ chhoḌo

mujhe ab ye batāo tum

ki coffē ab bhī vaise hī

binā shakkar ke piitī ho

ki ab bhī bhuul jaatī ho

dupaTTa saath lenā tum

ki ab bhī muskurātī ho

'farāz' aur 'faiz' ko paḌh kar

ki ab bhī apne kamre meñ

paḌe us āḳhirī ḳhat ko

udāsī se bharī āñkhoñ se

ab bhī paḌh rahī hoñgī

ki ab bhī

ḳhair chhoḌo jaane do bas ho gayā jānāñ

december aa gaya jaanan

wahi kaghaz ka TukDa

ab bhi mere hath mein hi hai

jo pal pal mujh ko

us viran sannaTe ki jaanib khinch leta hai

abhi bhi dhup mein bahar nikalne

par ajab si koft hoti hai

main apne nam ke a se

bhi aage aa chuka hun ab

aur ab ye sochta hun

kya karunga in kitabon ka

jo tum ne chhoD di thin

bich mein hi mujh ko paDhne ko

baDa mayus hai nietzsche

baDa hairan hai kaamu

tumhaare lauT jaane se

bahut viran apna campus hai

yar dekho tum

wahan ke phul kya ab bhi

khile aur khil rahe honge

wahan ki sham kya ab bhi

tumhaari muntazir hogi

chalo ye sab yahin chhoDo

mujhe ab ye batao tum

ki coffee ab bhi waise hi

bina shakkar ke piti ho

ki ab bhi bhul jati ho

dupaTTa sath lena tum

ki ab bhi muskuraati ho

'faraaz' aur 'faiz' ko paDh kar

ki ab bhi apne kamre mein

paDe us aaKHiri KHat ko

udasi se bhari aankhon se

ab bhi paDh rahi hongi

ki ab bhi

KHair chhoDo jaane do bas ho gaya jaanan