numaish-gah

raat gardish meñ hai zamīñ kī tarah

raushnī dā.era banātī hai

raushnī jis kī sard bāñhoñ meñ

ek tārīḳh phaḌphaḌātī hai

qumqume haiñ ki āñsūoñ kī lakīr

halqa-ārā hai sūrat-e-zanjīr

kho ga.ī hai na jaane ruuh kahāñ

jaise har aadmī hai ik tasvīr

rang-o-roġhan hai biich kī dīvār

us taraf kaun dekhne jaa.e

sat.h se kaun ho buland itnā

sochnā ye hai paañv ke nīche

jab na hogī zamīñ to kyā hogā

kaun naape diloñ kī gahrā.ī

kārvāñ kārvāñ hai tanhā.ī

chehre āñkhoñ se ruḳh bachā.e hue

jism dil se nazar churā.e hue

ik dhuāñ nutq se samā.at tak

raakh ke Dher bujhte sīnoñ meñ

ik sharar bhī nahīñ jabīnoñ meñ

ḳhvāh marham mile na zaḳhmoñ ko

paTTiyoñ ko libās kahne do

ek hairat-farosh vīrānī

ek mahshar-tarāz sannāTā

qahqahoñ ke nahīf kāñdhoñ par

bojh faulād kī chaTānoñ kā

zindagī biktī hai dukānoñ meñ

maut ḳhalvat-guzīñ hai jānoñ meñ

raat gardish meñ hai zamīñ kī tarah

raushnī dā.era banātī hai

raushnī jis kī sard bāñhoñ meñ

ek tārīḳh phaḌphaḌātī hai

chhan chhanā chhan kī zahr-afshāñ guuñj

ye thirakte badan machaltī ruuh

bhuuk kā raqs raqs noToñ kā

raqs jaltī sulagtī choToñ kā

kaun dekhe ye raqs jis ke liye

bheñT āñkhoñ kī shart avval hai

kis ko āñkhoñ se apnī pyaar nahīñ

aur ye raqs to anokhā hai

dil kī āñkheñ bhī maañg letā hai

raqs jaarī hai ik zamāne se

raqs dhartī kā ruk sakā na kabhī

nāchtā vaqt nāchte lamhāt

aadmī ko nachā.e jaate haiñ

sā.ateñ haiñ ki bain kā naġhma

zindagī hai ki jhūmtā huā naag

dil dhaḌakte haiñ DhūñDhtī hai nigāh

aur saperā nazar nahīñ aatā

dard kā zahr kaun utāregā

kaun phūñkegā naag kā mantar

tan kā bas kaise duudh tak pahuñche

naag ko jhūmtā hī rahne do

bain kī aag yūñhī bahne do

biit jaa.e isī tarah kuchh vaqt

aur saperā kahīñ se aa jaa.e

baat itnī magar baḌhā.eñ kyoñ

ik saperā ḳharīd leñ ham bhī

in dukānoñ kā aur hāsil kyā

in dukānoñ meñ kyā nahīñ biktā

kyoñ sapere kā intizār kareñ

baat bantī hai chand sikkoñ meñ

varna biknā paḌe na ḳhud ham ko

ye zamāna hai misr kā bāzār

kaam kis ke payambarī aa.ī

sab se ūñchī hai yaañ zuleḳhā.ī

raat gardish mein hai zamin ki tarah

raushni daera banati hai

raushni jis ki sard banhon mein

ek tariKH phaDphaDati hai

qumqume hain ki aansuon ki lakir

halqa-ara hai surat-e-zanjir

kho gai hai na jaane ruh kahan

jaise har aadmi hai ek taswir

rang-o-roghan hai bich ki diwar

us taraf kaun dekhne jae

sath se kaun ho buland itna

sochna ye hai panw ke niche

jab na hogi zamin to kya hoga

kaun nape dilon ki gahrai

karwan karwan hai tanhai

chehre aankhon se ruKH bachae hue

jism dil se nazar churae hue

ek dhuan nutq se samaat tak

rakh ke Dher bujhte sinon mein

ek sharar bhi nahin jabinon mein

KHwah marham mile na zaKHmon ko

paTTiyon ko libas kahne do

ek hairat-farosh virani

ek mahshar-taraaz sannaTa

qahqahon ke nahif kandhon par

bojh faulad ki chaTanon ka

zindagi bikti hai dukanon mein

maut KHalwat-guzin hai jaanon mein

raat gardish mein hai zamin ki tarah

raushni daera banati hai

raushni jis ki sard banhon mein

ek tariKH phaDphaDati hai

chhan chhana chhan ki zahr-afshan gunj

ye thirakte badan machalti ruh

bhuk ka raqs raqs noTon ka

raqs jalti sulagti choTon ka

kaun dekhe ye raqs jis ke liye

bhenT aankhon ki shart awwal hai

kis ko aankhon se apni pyar nahin

aur ye raqs to anokha hai

dil ki aankhen bhi mang leta hai

raqs jari hai ek zamane se

raqs dharti ka ruk saka na kabhi

nachta waqt nachte lamhat

aadmi ko nachae jate hain

saaten hain ki bain ka naghma

zindagi hai ki jhumta hua nag

dil dhaDakte hain DhunDhti hai nigah

aur sapera nazar nahin aata

dard ka zahr kaun utarega

kaun phunkega nag ka mantar

tan ka bas kaise dudh tak pahunche

nag ko jhumta hi rahne do

bain ki aag yunhi bahne do

bit jae isi tarah kuchh waqt

aur sapera kahin se aa jae

baat itni magar baDhaen kyon

ek sapera KHarid len hum bhi

in dukanon ka aur hasil kya

in dukanon mein kya nahin bikta

kyon sapere ka intizar karen

baat banti hai chand sikkon mein

warna bikna paDe na KHud hum ko

ye zamana hai misr ka bazar

kaam kis ke payambari aai

sab se unchi hai yan zuleKHai