numu

ḳhizāñ ke daur meñ phailī barahna shāḳhoñ ne

jaḌoñ kī tarah se rañg-e-shafaq ko chūsā thā

sunahrī dhuup kī tābāniyoñ ko jazb kiyā

safed barf kī narmī ko yuuñ samoyā thā

ki ab bahār ke aane pe vo gulābī shafaq

guloñ ke ruup meñ shāḳhoñ pe phuuT aa.ī hai

safed barf ne phūloñ kī pañkhuḌī kā badan

sunahrī dhuup ne piile guloñ ko Dhālā hai

bahār kā ye tasavvur javān rakhtā hai

ḳhizāñ-o-yās ke phailā.e yaḳh nazāroñ meñ

ḳhayāl-e-zīst ḳhushī kāmrāniyoñ ko mirī

KHizan ke daur mein phaili barahna shaKHon ne

jaDon ki tarah se rang-e-shafaq ko chusa tha

sunahri dhup ki tabaniyon ko jazb kiya

safed barf ki narmi ko yun samoya tha

ki ab bahaar ke aane pe wo gulabi shafaq

gulon ke rup mein shaKHon pe phuT aai hai

safed barf ne phulon ki pankhuDi ka badan

sunahri dhup ne pile gulon ko Dhaala hai

bahaar ka ye tasawwur jawan rakhta hai

KHizan-o-yas ke phailae yaKH nazaron mein

KHayal-e-zist KHushi kaamraniyon ko meri