nuqrai tilism

raat tārīk thī ik kaale samundar kī tarah

ajnabī des thā tanhā.ī thī

jagmagāte hue bāzāroñ kī be-kaif fazā

aur bojhal sā kiye detī thī jism-o-jāñ ko

shahar kī had se pare

duur tak phaile hue ret kī saffākī thī

āsmān dhuul meñ lipTā ho tā-hadd-e-nazar

koī saaya na sarāb

car meñ bajtā huā giit bhī alfāz kī takrār thā

be-rūh thī lai

phir achānak mujhe mānūs se ik lams ne bedār kiyā

thapkiyāñ de ke mire shāne par

pyaar se sargoshī kī

maiñ tire saath yahāñ tak aayā

maiñ abhī chuum ke aayā huuñ tirī ḳhāk-e-vatan

terī galiyāñ tire mānūs dar-o-bām terā ghar āñgan

tere māñ-bāp ke āzurda se mushfiq chehre

muntazir āñkhoñ kī ḳhāmoshī ko chuum aayā huuñ

tere āñgan kī chamelī kī duā laayā huuñ

yaad hai yaad hai

koī kahtā hī rahā

vo september kī ḳhunuk raat thī maiñ thā tum thiiñ

radio par koī bajtī huī spanish dhun

duur pīpal ke ghane jañgal meñ

ham ko mad.hosh kiye detī thī

yaad hai

tujh ko laḌakpan meñ kabhī

aam ke baur kī bele kī chamelī kī mahak saath liye

kachche āñgan meñ jhuke niim kī shāḳhoñ meñ havā bahtī thī

aur ham donoñ bahut der talak jāgte the

raaz kī bāteñ kiyā karte the

koī kahtā hī rahā

yaad karo yaad karo

diip se diip jale yādoñ ke

aur kuchh aisā huā

yak-ba-yak chalne lagī bād-e-sabā najd ke sahrāoñ meñ

aur ik nuur kā dariyā sā nazar aane lagā sahrā meñ

car ke band darīche se utar aayā mirī god meñ chāñd

raat tarik thi ek kale samundar ki tarah

ajnabi des tha tanhai thi

jagmagate hue bazaron ki be-kaif faza

aur bojhal sa kiye deti thi jism-o-jaan ko

shahar ki had se pare

dur tak phaile hue ret ki saffaki thi

aasman dhul mein lipTa ho ta-hadd-e-nazar

koi saya na sarab

car mein bajta hua git bhi alfaz ki takrar tha

be-ruh thi lai

phir achanak mujhe manus se ek lams ne bedar kiya

thapkiyan de ke mere shane par

pyar se sargoshi ki

main tere sath yahan tak aaya

main abhi chum ke aaya hun teri KHak-e-watan

teri galiyan tere manus dar-o-baam tera ghar aangan

tere man-bap ke aazurda se mushfiq chehre

muntazir aankhon ki KHamoshi ko chum aaya hun

tere aangan ki chameli ki dua laya hun

yaad hai yaad hai

koi kahta hi raha

wo september ki KHunuk raat thi main tha tum thin

radio par koi bajti hui spanish dhun

dur pipal ke ghane jangal mein

hum ko madhosh kiye deti thi

yaad hai

tujh ko laDakpan mein kabhi

aam ke baur ki bele ki chameli ki mahak sath liye

kachche aangan mein jhuke nim ki shaKHon mein hawa bahti thi

aur hum donon bahut der talak jagte the

raaz ki baaten kiya karte the

koi kahta hi raha

yaad karo yaad karo

dip se dip jale yaadon ke

aur kuchh aisa hua

yak-ba-yak chalne lagi baad-e-saba najd ke sahraon mein

aur ek nur ka dariya sa nazar aane laga sahra mein

car ke band dariche se utar aaya meri god mein chand