nuqton ki kashmakash

qāfiyoñ se koī chhuTkārā dilā.e

ban ga.ī taklīf-e-jāñ mujh ko radīf

bahr hai har vaqt dil meñ maujzan

(qāfiye kī āzmā.ish se guzar

qāfiya-paimā na ban

qāfiye ne aa dabochā qāfiya-paimā na ho)

khurdure-pan ko tarastī hai zabāñ

kyuuñ mañjhī haiñ is qadar nazmeñ mirī

kyuuñ sajī hai is qadar merī ġhazal

(qāfiye ko rok phir aane lagā)

zehn hai majnūn-e-ādāb-e-suḳhan

dil purāne ras kā rasiyā hai abhī

nikhat-e-māzi kā basiyā hai abhī

(qāfiya phir aa gayā majbūr huuñ

qāfiye ko rok phir aane lagā)

sochtā huuñ bahr kī maujoñ meñ jakḌā huuñ abhī

qāfiya to ḳhair kaafī ruk gayā

bahr to TuuTī nahīñ

bahr ik bahr-e-basīt

bahr ik dev-e-tanomand-o-muhīt

is qadar jiddat se kyuuñ hai kad mujhe

zehn o dil haiñ kyuuñ rivāyat ke asiir

qafiyon se koi chhuTkara dilae

ban gai taklif-e-jaan mujh ko radif

bahr hai har waqt dil mein maujzan

(qafiye ki aazmaish se guzar

qafiya-paima na ban

qafiye ne aa dabocha qafiya-paima na ho)

khurdure-pan ko tarasti hai zaban

kyun manjhi hain is qadar nazmen meri

kyun saji hai is qadar meri ghazal

(qafiye ko rok phir aane laga)

zehn hai majnun-e-adab-e-suKHan

dil purane ras ka rasiya hai abhi

nikhat-e-mazi ka basiya hai abhi

(qafiya phir aa gaya majbur hun

qafiye ko rok phir aane laga)

sochta hun bahr ki maujon mein jakDa hun abhi

qafiya to KHair kafi ruk gaya

bahr to TuTi nahin

bahr ek bahr-e-basit

bahr ek dew-e-tanomand-o-muhit

is qadar jiddat se kyun hai kad mujhe

zehn o dil hain kyun riwayat ke asir