nuqush-e-fikr-o-‘amal

dariyā-e-tabī'at ko ravāñ ham ne kiyā hai

durr-e-hā-e-ma'ānī ko 'ayāñ ham ne kiyā hai

yuuñ hāl-e-dil-e-zār bayāñ ham ne kiyā hai

ḳhud un ko bhī ab ashk-fishāñ ham ne kiyā hai

in meñ bhī nazar kuchh kī haqā.eq se hai mahrūm

ye tajziya-e-dīda-varāñ ham ne kiyā hai

kam haiñ bahut insāniyat-o-ḳhulq kī qadreñ

ye tajraba-e-ahl-e-jahāñ ham ne kiyā hai

hai baat hamārī hī ki rindoñ ko bahar-taur

zer-e-asar-e-pīr-e-muġhāñ ham ne kiyā hai

kyā ḳhuub ubhar aa.e nuqūsh-e-gul-o-lāla

āñkhoñ ko jo ḳhūñ-nāba-fashāñ ham ne kiyā hai

ik moḌ diyā hai ruḳh-e-tārīḳh ko jis ne

kirdār vo 'ālam pe 'ayāñ ham ne kiyā hai

māhaul ke zulmat-kada-e-tīra-shabī ko

ik jalva-gah-e-kāhkashāñ ham ne kiyā hai

goyā haiñ dil-o-dīda zabāñ sākit-o-ḳhāmosh

is tarz se bhī shor-e-fuġhāñ ham ne kiyā hai

paiham rahe ham husn-e-yaqīñ ke mutajassis

kab koī ġhalat vahm-o-gumāñ ham ne kiyā hai

'ibrat-kada-e-dahr kī ik khīñch dī tasvīr

jab zikr-e-jahān-e-guzarāñ ham ne kiyā hai

shā.istagī-e-fikr ko bhī naaz hai jis par

paidā vahī uslūb-e-bayāñ ham ne kiyā hai

labbaik kahā hai rasan-o-dār ko jis ne

vo hausla-e-qalb-e-tapāñ ham ne kiyā hai

ḳhallāq-e-do-'ālam kā kiyā zikr-o-tasavvur

kyā ḳhuub 'ilāj-e-ġham-e-jāñ ham ne kiyā hai

ham ne hī banāyā unheñ mardān-e-ḳhush-anfās

tabdīl ruḳh-e-bāda-kashāñ ham ne kiyā hai

har ḳhalvat-o-jalvat meñ jo kahte rahe daa.im

vo barsar-e-mimbar bhī bayāñ ham ne kiyā hai

har haal meñ raazī rahe ham us kī razā meñ

kab tabsira-e-sūd-o-ziyāñ ham ne kiyā hai

kohsār-o-samā jis ke uThāne se the mā'zūr

bardāsht vo ik bār-e-garāñ ham ne kiyā hai

haq-goī agar jurm hai ye jurm niko-tar

ham DaT ke ye kahte haiñ ki haañ ham ne kiyā hai

insān haiñ insān ham ik ashraf-e-maḳhlūq

tasḳhīr jo ye kaun-o-makāñ ham ne kiyā hai

jis darja pa.e-'ālam-e-bālā hai zarūrī

'in'ām' vo sāmān kahāñ ham ne kiyā hai

dariya-e-tabi'at ko rawan hum ne kiya hai

durr-e-ha-e-ma'ani ko 'ayan hum ne kiya hai

yun haal-e-dil-e-zar bayan hum ne kiya hai

KHud un ko bhi ab ashk-fishan hum ne kiya hai

in mein bhi nazar kuchh ki haqaeq se hai mahrum

ye tajziya-e-dida-waran hum ne kiya hai

kam hain bahut insaniyat-o-KHulq ki qadren

ye tajraba-e-ahl-e-jahan hum ne kiya hai

hai baat hamari hi ki rindon ko bahar-taur

zer-e-asar-e-pir-e-mughan hum ne kiya hai

kya KHub ubhar aae nuqush-e-gul-o-lala

aankhon ko jo KHun-naba-fashan hum ne kiya hai

ek moD diya hai ruKH-e-tariKH ko jis ne

kirdar wo 'alam pe 'ayan hum ne kiya hai

mahaul ke zulmat-kada-e-tira-shabi ko

ek jalwa-gah-e-kahkashan hum ne kiya hai

goya hain dil-o-dida zaban sakit-o-KHamosh

is tarz se bhi shor-e-fughan hum ne kiya hai

paiham rahe hum husn-e-yaqin ke mutajassis

kab koi ghalat wahm-o-guman hum ne kiya hai

'ibrat-kada-e-dahr ki ek khinch di taswir

jab zikr-e-jahan-e-guzaran hum ne kiya hai

shaistagi-e-fikr ko bhi naz hai jis par

paida wahi uslub-e-bayan hum ne kiya hai

labbaik kaha hai rasan-o-dar ko jis ne

wo hausla-e-qalb-e-tapan hum ne kiya hai

KHallaq-e-do-'alam ka kiya zikr-o-tasawwur

kya KHub 'ilaj-e-gham-e-jaan hum ne kiya hai

hum ne hi banaya unhen mardan-e-KHush-anfas

tabdil ruKH-e-baada-kashan hum ne kiya hai

har KHalwat-o-jalwat mein jo kahte rahe daim

wo barsar-e-mimbar bhi bayan hum ne kiya hai

har haal mein raazi rahe hum us ki raza mein

kab tabsira-e-sud-o-ziyan hum ne kiya hai

kohsar-o-sama jis ke uThane se the ma'zur

bardasht wo ek bar-e-garan hum ne kiya hai

haq-goi agar jurm hai ye jurm niko-tar

hum DaT ke ye kahte hain ki han hum ne kiya hai

insan hain insan hum ek ashraf-e-maKHluq

tasKHir jo ye kaun-o-makan hum ne kiya hai

jis darja pae-'alam-e-baala hai zaruri

'in'am' wo saman kahan hum ne kiya hai