omission

kisī darāz meñ paḌī hoñgī

merī āñkhoñ se lipTī roġhnī putliyāñ

jin pe bohtān hai

habs-rasīda kamre kī siskiyāñ kaaT khāne kā

tanomand ḳhātūn kī tarsīb-zada rānoñ ke beach

tasādum ke halqe meñ paḌā

zard sīlan ke ḳhol meñ raḳhne buntā

shahr-e-ma.adūm kā lāsha nochte ḳhudā ko ghūrtā huā maiñ

ḳhudā jo surḳh doshīza ke badan par kunda bosa-gāhoñ ke mānind muqaddas

siyāh-mast mallāh kī aurat mere siine pe sar rakhte hue chiñghāḌtī hai

vo jahāz ke mastūl se kuud kar marā thā

jañg ke dinoñ meñ purtagālī hasīna se mulāqāt

vo yaqīnan mujhe mubtalā kar saktī thī

magar

ham jazīroñ se ḳhālī haath lauTne vaale qasam khāte haiñ

hamāre paas mashkīzoñ meñ saste guḌ kī sharāb hai

aur kuchh dost jo vāfar miqdār meñ tambākū ugā rahe haiñ

sartānī rutūbatoñ meñ luThḌe

hamāre Taḳhne bārūd se zaḳhmī haiñ

ham apne bāzuoñ se jhaḌte hue baal tumheñ dikhā sakte haiñ

nam-ḳhurda bandūqoñ aur nākāra jēpoñ ke alāva

hamāre qabze meñ chand laḌkiyāñ aur rasad-ḳhāne haiñ

dhajjiyāñ aur chīthḌe sameTne ko nahīf uñgliyāñ ziyāda nahīñ haiñ

nichlī darāz se merī bohtān zada āñkheñ nikāl laao

mere bachche

kaash tumheñ javānī meñ maut aa jaatī

kisi daraaz mein paDi hongi

meri aankhon se lipTi roghni putliyan

jin pe bohtan hai

habs-rasida kamre ki siskiyan kaT khane ka

tanomand KHatun ki tarsib-zada ranon ke beach

tasadum ke halqe mein paDa

zard silan ke KHol mein raKHne bunta

shahr-e-madum ka lasha nochte KHuda ko ghurta hua main

KHuda jo surKH doshiza ke badan par kunda bosa-gahon ke manind muqaddas

siyah-mast mallah ki aurat mere sine pe sar rakhte hue chinghaDti hai

wo jahaz ke mastul se kud kar mara tha

jang ke dinon mein purtagali hasina se mulaqat

wo yaqinan mujhe mubtala kar sakti thi

magar

hum jaziron se KHali hath lauTne wale qasam khate hain

hamare pas mashkizon mein saste guD ki sharab hai

aur kuchh dost jo wafar miqdar mein tambaku uga rahe hain

sartani rutubaton mein luThDe

hamare TaKHne barud se zaKHmi hain

hum apne bazuon se jhaDte hue baal tumhein dikha sakte hain

nam-KHurda banduqon aur nakara jeepon ke alawa

hamare qabze mein chand laDkiyan aur rasad-KHane hain

dhajjiyan aur chithDe sameTne ko nahif ungliyan ziyaada nahin hain

nichli daraaz se meri bohtan zada aankhen nikal lao

mere bachche

kash tumhein jawani mein maut aa jati