padash

udaas mausam kā bojh uThā.e

havā ke baazū bhī thak ga.e haiñ

vo sabz-o-shādāb Tahniyoñ par

guloñ kī ḳhushbū kī gard tah-ba-tah jamī hai

ye pahlī bārish ke narm qatre

pahāḌiyoñ ke bhī saḳht sīnoñ ko chiir deñge

ye reza reza bikher deñge

chaTān kī tarh

shadīd-tar saḳht hausloñ ko

gumān hotā hai

ye afrātafarī hai mere andar

ki zindagī kī haqīqatoñ ne

ḳhayāl ke ab tamām ḳhāke miTā diye haiñ

ye roz-o-shab kī ġhubār-ālūd sā’atoñ ne goyā

haqīqī rang ab uḌā diye haiñ

ye pahlī bārish se qatra qatra barastā paanī bhī

ret ke ik 'azīm sailāb meñ badal kar

mirī hī āñkhoñ ke ḳhārzāroñ ke ḳhandaqoñ meñ giregā aa kar

ki ek muddat se chashm-e-be-ḳhvāb meñ mirī ashk bhī nahīñ hai

nam nahīñ hai

umīd-afzā kisī kiran kā bharam nahīñ hai

ye sab sazā.eñ haiñ

us ḳhatā kī

ki vaqt ne zehn se tere ḳhāl-o-ḳhad miTā.e haiñ

aur āñkheñ

ḳhayāl kī sad-rang duniyā meñ

terī sūrat se nā-āshnā haiñ

udas mausam ka bojh uThae

hawa ke bazu bhi thak gae hain

wo sabz-o-shadab Tahniyon par

gulon ki KHushbu ki gard tah-ba-tah jami hai

ye pahli barish ke narm qatre

pahaDiyon ke bhi saKHt sinon ko chir denge

ye reza reza bikher denge

chaTan ki tarh

shadid-tar saKHt hauslon ko

guman hota hai

ye afraatafari hai mere andar

ki zindagi ki haqiqaton ne

KHayal ke ab tamam KHake miTa diye hain

ye roz-o-shab ki ghubar-alud sa’aton ne goya

haqiqi rang ab uDa diye hain

ye pahli barish se qatra qatra barasta pani bhi

ret ke ek 'azim sailab mein badal kar

meri hi aankhon ke KHarzaron ke KHandaqon mein girega aa kar

ki ek muddat se chashm-e-be-KHwab mein meri ashk bhi nahin hai

nam nahin hai

umid-afza kisi kiran ka bharam nahin hai

ye sab sazaen hain

us KHata ki

ki waqt ne zehn se tere KHal-o-KHad miTae hain

aur aankhen

KHayal ki sad-rang duniya mein

teri surat se na-ashna hain