pagalon ki madh mein

pāgaloñ se nahīñ

bahut Dar lagtā hai, mujhe

normal aur zahīn logoñ se

kuchh bhī kar sakte haiñ

vo

apnī mahbūbiyat meñ

qahr aur fitne se bharī

ḳhud-pasandī meñ

kuchh bhī soch sakte haiñ

kuchh bhī chaah sakte haiñ

mansūbe banānā

aur sāzisheñ karnā mushkil nahīñ hotā

un ke liye

yaqīn rahtā hai unheñ

kuchh bhī kar saktī hai zehānat

agar mushkil koī vaar karegī

to Dhaal ban jā.egī zehānat

normal

bahut muta.assir hote haiñ un se

un jaisā honā chāhte haiñ

unhī kā saath dete haiñ

kisī bhī aurat ke baare meñ

kuchh bhī soch sakte haiñ

zahīn aur normal

mantiq se chalte haiñ aur hisāb se

ishq nahīñ kar sakte isī liye

ye baat to sābit nahīñ

ki ishq

pahle mahbūb ke dil meñ paidā hotā hai

aurteñ ye sab samajhtī haiñ

mardoñ se kahīñ ziyāda

ahmaq-tarīn lagne vaalī aurat bhī

in muāmloñ meñ

kahīñ aage hotī hai kisī bhī mard se

phir bhī

phañs hī jaatī haiñ be-chārī

phañstī chalī jaatī hai

pāgaloñ ko qubūl nahīñ kartīñ vo

hālāñki vahī jāntī haiñ sab se ziyāda

ishq to kaam hai sirf pāgaloñ kā

naach sakte haiñ pāgal

un ke ḳhayāl meñ

yaad kar sakte haiñ unheñ

phūloñ ko dekh kar

sun sakte haiñ havā se un kī bāteñ

jo un kī taraf se na bhī aa.ī ho

daraḳhtoñ ko chaltā huā dekh sakte haiñ

un ke saath

bharī dopahroñ meñ

dhuup par hairān ho sakte haiñ

un ke muqābil khaḌā kar sakte haiñ

dhuup aur saa.e ko pāgal

aur shā.erī ban saktī haiñ

un ke baare meñ

sirf pāgaloñ kī bāteñ

pagalon se nahin

bahut Dar lagta hai, mujhe

normal aur zahin logon se

kuchh bhi kar sakte hain

wo

apni mahbubiyat mein

qahr aur fitne se bhari

KHud-pasandi mein

kuchh bhi soch sakte hain

kuchh bhi chah sakte hain

mansube banana

aur sazishen karna mushkil nahin hota

un ke liye

yaqin rahta hai unhen

kuchh bhi kar sakti hai zehanat

agar mushkil koi war karegi

to Dhaal ban jaegi zehanat

normal

bahut mutassir hote hain un se

un jaisa hona chahte hain

unhi ka sath dete hain

kisi bhi aurat ke bare mein

kuchh bhi soch sakte hain

zahin aur normal

mantiq se chalte hain aur hisab se

ishq nahin kar sakte isi liye

ye baat to sabit nahin

ki ishq

pahle mahbub ke dil mein paida hota hai

aurten ye sab samajhti hain

mardon se kahin ziyaada

ahmaq-tarin lagne wali aurat bhi

in muamlon mein

kahin aage hoti hai kisi bhi mard se

phir bhi

phans hi jati hain be-chaari

phansti chali jati hai

pagalon ko qubul nahin kartin wo

haalanki wahi jaanti hain sab se ziyaada

ishq to kaam hai sirf pagalon ka

nach sakte hain pagal

un ke KHayal mein

yaad kar sakte hain unhen

phulon ko dekh kar

sun sakte hain hawa se un ki baaten

jo un ki taraf se na bhi aai ho

daraKHton ko chalta hua dekh sakte hain

un ke sath

bhari dopahron mein

dhup par hairan ho sakte hain

un ke muqabil khaDa kar sakte hain

dhup aur sae ko pagal

aur shaeri ban sakti hain

un ke bare mein

sirf pagalon ki baaten