pani mein gum KHwab

ḳhvāb aur ḳhvāhish meñ

fāsla nahīñ hotā

aks aur paanī ke

darmiyān āñkhoñ meñ

ā.īna nahīñ hotā

soch kī lakīroñ se

shakl kyā banāoge

dard kī musallas meñ

zāviya nahīñ hotā

be-shumār nasloñ ke

ḳhvāb ek se lekin

niiñd aur jigrātā

ek sā nahīñ hotā

jauhrī nizāmoñ meñ

naam bhuul jaate haiñ

code yaad rahte haiñ

itemi dhamākoñ se

tābkār nasloñ ke

ḳhvāb TuuT jaate haiñ

shahr Duub jaate haiñ

markaze bikharte haiñ

dā.ere simaTte haiñ

raqs ke tamāshe meñ

arz o shams hote haiñ

aur ḳhudā nahīñ hotā

sad-hazār sāloñ meñ

ek nuur lamhe kā

TuuT kar bikhar jaanā

hādsa to hotā hai

vāqi.a nahīñ hotā

history tasalsul hai

ek baar TuuTe to

dūr-bīñ nigāheñ bhī

thak ke haar jaatī haiñ

gum-shuda zamīnoñ se

munqat.a zamānoñ se

rābta nahīñ hotā

nanhe munne bachchoñ ke

nau-bahār hāthoñ meñ

phuul kaun dekhegā

aane vaalī sadiyoñ meñ

terī merī āñkhoñ ke

ḳhvāb kaun dekhegā

zer-e-āb chīzoñ kā

kuchh patā nahīñ hotā!

KHwab aur KHwahish mein

fasla nahin hota

aks aur pani ke

darmiyan aankhon mein

aaina nahin hota

soch ki lakiron se

shakl kya banaoge

dard ki musallas mein

zawiya nahin hota

be-shumar naslon ke

KHwab ek se lekin

nind aur jigraata

ek sa nahin hota

jauhri nizamon mein

nam bhul jate hain

code yaad rahte hain

itemi dhamakon se

tabkar naslon ke

KHwab TuT jate hain

shahr Dub jate hain

markaze bikharte hain

daere simaTte hain

raqs ke tamashe mein

arz o shams hote hain

aur KHuda nahin hota

sad-hazar salon mein

ek nur lamhe ka

TuT kar bikhar jaana

hadsa to hota hai

waqia nahin hota

history tasalsul hai

ek bar TuTe to

dur-bin nigahen bhi

thak ke haar jati hain

gum-shuda zaminon se

munqata zamanon se

rabta nahin hota

nanhe munne bachchon ke

nau-bahaar hathon mein

phul kaun dekhega

aane wali sadiyon mein

teri meri aankhon ke

KHwab kaun dekhega

zer-e-ab chizon ka

kuchh pata nahin hota!