pasban-e-urdu

kaheñ na kyuuñ ai qavī tujhe ham ba-sidq-e-dil pāsbān-e-urdu

banā hai terī hī sa.ī-o-kāvish se saifiya gulsitān-e-urdu

nafas nafas meñ tire yaqīnan basī hai bū-e-zabān-e-urdu

tirī navā hai navā-e-urdu tirā bayāñ hai bayān-e-urdu

dikhā.īñ bhopal ko tire hī junūñ ne jahd-o-amal kī rāheñ

vagarna māyūs ho chuke the yahāñ ke chāra-garān-e-urdu

vajūd terā sabhī ke haq meñ hai chashma-o-ābshār-o-dariyā

bujhāte haiñ pyaas apnī apnī tujhī se sab tishnigān-e-urdu

ise zamāna-shanāsī terī na ham kaheñge to kyā kaheñge

banā diyā 'saifiya' ko tū ne jo ek dārul-amān-e-urdu

tujhī se shahr-e-ġhazal ko iqbāliyāt kī manzileñ milī haiñ

tire hī azm-o-amal se hai gāmzan yahāñ kārvān-e-urdu

tirā ujālā miTā rahā hai shab-e-jahālat kī tīrgī ko

chamak rahā hai tū ban ke bhopal meñ mah-e-āsmān-e-urdu

khilā.e haiñ shāḳh shāḳh tū ne yahāñ pe nutq-o-navā ke ġhunche

ġhalat nahīñ hai jo kah rahe haiñ sabhī tujhe ḳhush-bayān-e-urdu

tire azā.em kī istaqāmat pe sar-ba-kaf haiñ harīf tere

ḳhushā ki tere javān hāthoñ meñ aaj bhī hai kamān-e-urdu

sad-āfrīñ terī himmatoñ par sad-āfrīñ terī jur.atoñ par

sunā.ī hai bazm-e-ġhair meñ tū ne bārhā dāstān-e-urdu

ye kam nahīñ hai ki mo'tarif hai tirī basīrat kā ye zamāna

rahā hai sad.hā ḳhulūs-e-dil se tū shāmil-e-āshiqān-e-urdu

ravāñ haiñ taqrīr aur tahrīr se tirī āgahī ke chashme

tirā qalam hai vaqār-e-urdu tirī zabāñ tarjumān-e-urdu

mujalla 'ġhālib' pe kar ke shaa.e kiyā hai be-shak kamāl tū ne

jahān-e-ilm-o-adab ke haq meñ hai ḳhuub ye armuġhān-e-urdu

na.e na.e gul khilā rahā hai adab meñ tere qalam kā jaadū

tirī farāsat ke mo'tarif haiñ tamām-tar nukta-dān-e-urdu

agarche rāhoñ meñ terī haa.il hue haiñ dīvār ban ke aksar

magar tire azm-o-hausla se ḳhajil haiñ sab hāsidān-e-urdu

ye terī koshish hifāzatoñ kī ye terā jazba salāmtī kā

na ho to urdu ko bech khā.eñ zarā meñ ye tājirān-e-urdu

misāl-e-ḳhurshīd tū ne baḳhshī hai raushnī jin ko ilm-o-fan kī

chamak rahe haiñ adab ke gardūñ pe ban ke vo aḳhtarān-e-urdu

jo tere fan ke amiin ban kar fazā-e-ālam pa chhā ga.e haiñ

baḌī aqīdat se dekhte haiñ tujhe vo shā.istagān-e-urdu

ujālā karte raheñge yūñhī charāġh ban kar rah-e-talab meñ

har ik qadam par jo tū ne chhoḌe haiñ jagmagāte nishān-e-urdu

kahā hai tū ne bhī bārhā ḳhud yahīñ palī hai yahīñ baḌhī hai

kisī zabāñ kī harīf hargiz yahāñ nahīñ hai zabān-e-urdu

tire jihād-o-amal ke sadqe yaqīn hai ai qavī ye ham ko

isī tarah tū banā rahegā yahāñ sadā pāsbān-e-urdu

kahen na kyun ai qawi tujhe hum ba-sidq-e-dil pasban-e-urdu

bana hai teri hi sai-o-kawish se saifiya gulsitan-e-urdu

nafas nafas mein tere yaqinan basi hai bu-e-zaban-e-urdu

teri nawa hai nawa-e-urdu tera bayan hai bayan-e-urdu

dikhain bhopal ko tere hi junun ne jahd-o-amal ki rahen

wagarna mayus ho chuke the yahan ke chaara-garan-e-urdu

wajud tera sabhi ke haq mein hai chashma-o-abshaar-o-dariya

bujhate hain pyas apni apni tujhi se sab tishnigan-e-urdu

ise zamana-shanasi teri na hum kahenge to kya kahenge

bana diya 'saifiya' ko tu ne jo ek darul-aman-e-urdu

tujhi se shahr-e-ghazal ko iqbaaliyat ki manzilen mili hain

tere hi azm-o-amal se hai gamzan yahan karwan-e-urdu

tera ujala miTa raha hai shab-e-jahaalat ki tirgi ko

chamak raha hai tu ban ke bhopal mein mah-e-asman-e-urdu

khilae hain shaKH shaKH tu ne yahan pe nutq-o-nawa ke ghunche

ghalat nahin hai jo kah rahe hain sabhi tujhe KHush-bayan-e-urdu

tere azaem ki istaqamat pe sar-ba-kaf hain harif tere

KHusha ki tere jawan hathon mein aaj bhi hai kaman-e-urdu

sad-afrin teri himmaton par sad-afrin teri juraton par

sunai hai bazm-e-ghair mein tu ne barha dastan-e-urdu

ye kam nahin hai ki mo'tarif hai teri basirat ka ye zamana

raha hai sadha KHulus-e-dil se tu shamil-e-ashiqan-e-urdu

rawan hain taqrir aur tahrir se teri aagahi ke chashme

tera qalam hai waqar-e-urdu teri zaban tarjuman-e-urdu

mujalla 'ghaalib' pe kar ke shae kiya hai be-shak kamal tu ne

jahan-e-ilm-o-adab ke haq mein hai KHub ye armughan-e-urdu

nae nae gul khila raha hai adab mein tere qalam ka jadu

teri farasat ke mo'tarif hain tamam-tar nukta-dan-e-urdu

agarche rahon mein teri hail hue hain diwar ban ke aksar

magar tere azm-o-hausla se KHajil hain sab hasidan-e-urdu

ye teri koshish hifazaton ki ye tera jazba salamti ka

na ho to urdu ko bech khaen zara mein ye tajiran-e-urdu

misal-e-KHurshid tu ne baKHshi hai raushni jin ko ilm-o-fan ki

chamak rahe hain adab ke gardun pe ban ke wo aKHtaran-e-urdu

jo tere fan ke amin ban kar faza-e-alam pa chha gae hain

baDi aqidat se dekhte hain tujhe wo shaistagan-e-urdu

ujala karte rahenge yunhi charagh ban kar rah-e-talab mein

har ek qadam par jo tu ne chhoDe hain jagmagate nishan-e-urdu

kaha hai tu ne bhi barha KHud yahin pali hai yahin baDhi hai

kisi zaban ki harif hargiz yahan nahin hai zaban-e-urdu

tere jihad-o-amal ke sadqe yaqin hai ai qawi ye hum ko

isi tarah tu bana rahega yahan sada pasban-e-urdu