pachhtawa

dar-o-dīvār pe hijrat ke nishāñ dekh aa.eñ

aao ham apne buzurgoñ ke makāñ dekh aa.eñ

apnī qismat meñ likhe haiñ jo virāsat kī tarah

aao ik baar vo zaḳhm-e-dil-o-jāñ dekh aa.eñ

aao bhīgī huī āñkhoñ se paḌheñ nauha-e-dil

aao bikhre hue rishtoñ kā ziyāñ dekh aa.eñ

jis se Takrā ke gire the kabhī arbāb-e-ḳhirad

aao nazdīk se vo sang-e-girāñ dekh aa.eñ

vaqt jaate hue kyā likh gayā peshānī par

aao āshuftagī-e-ahd-e-ravāñ dekh aa.eñ

TuuTā TuuTā huā dil le ke phireñ galiyoñ meñ

kachchī miTTī ke khilaunoñ kī dukāñ dekh aa.eñ

raushnī ke kahīñ āsār to baaqī hoñge

aao pighlī huī sham.oñ kā dhuāñ dekh aa.eñ

jin daraḳhtoñ ke tale raqs-e-sabā hotā thā

sūkhe pattoñ kā barasnā bhī vahāñ dekh aa.eñ

uḌ rahe hoñge kahīñ jhunD abābīloñ ke

aao sunsān darīchoñ kā samāñ dekh aa.eñ

ab farishtoñ ke sivā koī na aatā hogā

kaun detā hai ḳharābe meñ azaañ dekh aa.eñ

muddatoñ baa'd muhājir kī tarah aa.e haiñ

ruuTh jaa.e na khañDar aao miyāñ dekh aa.eñ

dar-o-diwar pe hijrat ke nishan dekh aaen

aao hum apne buzurgon ke makan dekh aaen

apni qismat mein likhe hain jo wirasat ki tarah

aao ek bar wo zaKHm-e-dil-o-jaan dekh aaen

aao bhigi hui aankhon se paDhen nauha-e-dil

aao bikhre hue rishton ka ziyan dekh aaen

jis se Takra ke gire the kabhi arbab-e-KHirad

aao nazdik se wo sang-e-giran dekh aaen

waqt jate hue kya likh gaya peshani par

aao aashuftagi-e-ahd-e-rawan dekh aaen

TuTa TuTa hua dil le ke phiren galiyon mein

kachchi miTTi ke khilaunon ki dukan dekh aaen

raushni ke kahin aasar to baqi honge

aao pighli hui shamon ka dhuan dekh aaen

jin daraKHton ke tale raqs-e-saba hota tha

sukhe patton ka barasna bhi wahan dekh aaen

uD rahe honge kahin jhunD ababilon ke

aao sunsan darichon ka saman dekh aaen

ab farishton ke siwa koi na aata hoga

kaun deta hai KHarabe mein azan dekh aaen

muddaton ba'd muhajir ki tarah aae hain

ruTh jae na khanDar aao miyan dekh aaen