paDaw

sayyadoñ kī bastī meñ

ek gahrī ḳhāmoshī

sansanātī phirtī hai

āgahī kā harf-e-ġham

sar jhukā.e rahtā hai

mo'atabar nahīñ rahtā

rāstoñ meñ har jānib

azm aur azmat kī

gard uḌtī rahtī hai

bārisheñ nahīñ hotīñ

dhuup kī tamāzat se

raah ke shajar saare

sūkhte hī jaate haiñ

sabz-rū nahīñ rahte

aam ke daraḳhtoñ par

baur bhī nahīñ aatā

jāmunoñ ke peḌoñ par

koyaleñ nahīñ ātīñ

sayyadoñ kī bastī meñ

masjidoñ ke mīnāre

bad-numā shikasta haiñ

gaah gaah vahshat hai

be-nishān galiyoñ meñ

khelte hue bachche

ab nazar nahīñ aate

maa.eñ bhī duā dene

dar talak nahīñ ātīñ

roz aane vaalā vo

ek jo gadāgar thā

ab kabhī nahīñ aatā

pyaas jo bujhātā thā

raah ke musāfir kī

chāh-e-āb thā jo ek

ḳhushk ho gayā kab kā

ghar ke band darvāze

sogvār rahte haiñ

dastakeñ nahīñ hotīñ

chaukhaToñ pe dīmak kī

surma.ī lakīreñ haiñ

zang se bharī kunDī

makḌiyoñ ke jāloñ se

bhar chukī hai āḳhir-kār

dukh ke taaq par har dam

nā-tavāñ charāġhoñ kī

zard lau lapaktī hai

ġham-zada darīchoñ se

be-hijāb tanhā.ī

reñgtī nikaltī hai

dil-zada makīnoñ ke

saath saath rahtī hai

sayyadoñ kī bastī meñ

shāmiyoñ ke lashkar kā

mustaqil paḌāv hai

sayyadon ki basti mein

ek gahri KHamoshi

sansanati phirti hai

aagahi ka harf-e-gham

sar jhukae rahta hai

mo'atabar nahin rahta

raston mein har jaanib

azm aur azmat ki

gard uDti rahti hai

barishen nahin hotin

dhup ki tamazat se

rah ke shajar sare

sukhte hi jate hain

sabz-ru nahin rahte

aam ke daraKHton par

baur bhi nahin aata

jamunon ke peDon par

koyalen nahin aatin

sayyadon ki basti mein

masjidon ke minare

bad-numa shikasta hain

gah gah wahshat hai

be-nishan galiyon mein

khelte hue bachche

ab nazar nahin aate

maen bhi dua dene

dar talak nahin aatin

roz aane wala wo

ek jo gadagar tha

ab kabhi nahin aata

pyas jo bujhata tha

rah ke musafir ki

chah-e-ab tha jo ek

KHushk ho gaya kab ka

ghar ke band darwaze

sogwar rahte hain

dastaken nahin hotin

chaukhaTon pe dimak ki

surmai lakiren hain

zang se bhari kunDi

makDiyon ke jalon se

bhar chuki hai aaKHir-kar

dukh ke taq par har dam

na-tawan charaghon ki

zard lau lapakti hai

gham-zada darichon se

be-hijab tanhai

rengti nikalti hai

dil-zada makinon ke

sath sath rahti hai

sayyadon ki basti mein

shamiyon ke lashkar ka

mustaqil paDaw hai