پڑوسی

اے عیش محل کے رہنے والو

دیکھو تو کبھی نظر اٹھا کر

حال اپنے پڑوسیوں کا بھی کچھ

ٹوٹے ہوئے جھونپڑوں کے اندر

انسان کی شکل میں بہائم

اولاد بشر گدھوں سے بد تر

ناچار و تباہ و زار و بیمار

رسوا و ذلیل و خوار و ابتر

فاقوں کی ہے جن کے رخ پہ زردی

فکروں سے جو ہو رہے ہیں لاغر

کپڑا نہیں جن کے تن پہ ثابت

چادر ہے نہ جن کے پاس بستر

سوکھی ہوئی روٹیاں بھی جن کو

ملتی نہیں دو دو وقت اکثر

دیکھی نہیں امن و عافیت کی

صورت بھی جنہوں نے زندگی بھر

قسمت میں نہیں ہے جن کی آرام

کولہو کا جو بیل ہیں سراسر

لیکن تمہیں غالباً یہ اک بات

معلوم نہیں ہے بندہ پرور

صدقہ ہے انہیں کی جوتیوں کا

ساری یہ تمہاری شوکت و فر

گر پھیر لیں یہ نظر کچھ اپنی

تم کو نہ رہے خبر کچھ اپنی