pahchan

vo lamha

ā.īnoñ kā dariyā

jis meñ tum ne apnā aap pahchānā

jis meñ tum ne jaanā

ki apne vajūd meñ qaid tum mahz sarāb ho

ki sheroñ meñ mahfūz ho

to tum āvāz nahīñ bāzgasht nahīñ

mahfil āvāzoñ irādoñ kā ḳhvāb ho

is dānish-gāh ke bādaloñ meñ kauñde bhare haiñ

mere hāthoñ meñ haath do

mere hāthoñ meñ haath do

siyāh sho.ale tum se kahte haiñ chalo

ham na.e baazū

na.ī buland āvāzoñ ke saath chaleñ

vāpas

us vatan ko jis kā farsh har roz

na.e lahū se dhoyā gayā hai

shīshoñ kī zabāneñ tum se kahtī haiñ

ab tum ik na.ī aag ke

aañsū kī tarah

zartār ho

wo lamha

aainon ka dariya

jis mein tum ne apna aap pahchana

jis mein tum ne jaana

ki apne wajud mein qaid tum mahz sarab ho

ki sheron mein mahfuz ho

to tum aawaz nahin bazgasht nahin

mahfil aawazon iradon ka KHwab ho

is danish-gah ke baadalon mein kaunde bhare hain

mere hathon mein hath do

mere hathon mein hath do

siyah shoale tum se kahte hain chalo

hum nae bazu

nai buland aawazon ke sath chalen

wapas

us watan ko jis ka farsh har roz

nae lahu se dhoya gaya hai

shishon ki zabanen tum se kahti hain

ab tum ek nai aag ke

aansu ki tarah

zartar ho