pahle sal ka tohfa

suno

tum ne mujhe takmīl kā ehsās baḳhshā hai

ki tum is jism meñ pahlī tamannā kā shagūfa ho

magar yuuñ hai

ki merī kokh meñ kilkāriyoñ kī karvaToñ se qabl

andeshe kī koñpal phuuT niklī hai

maiñ aksar sochtī thī ye akelā ghar kabhī ābād bhī hogā

maiñ us an-dekhe mehmāñ kī pazīrā.ī meñ kyā kyā ḳhvāb bhejūñgī

maiñ tāq-e-jāñ meñ kaise kaise gul-būTe sajā.ūñgī

maiñ us kī ek ik jumbish pe iz.hār-o-bayāñ ke sab darīche khol kar

sāvan ke bādal kī tarah

har rañg meñ pāgal havā ke saath har sū phail jā.ūñgī

maiñ ye bhī bhuul jā.ūñgī

ki us ik buuñd bhar rishte ke pīchhe umr bhar kī sañgsārī hī muqaddar hai

maiñ ye bhī bhuul jā.ūñgī

ki is hone kī lazzat aur zillat ne mujhe kyā kyā rulāyā hai

maiñ ye bhī bhuul jaanā chāhtī thī

ki maiñ kis jabr ke saa.e meñ pal kar

kaise andeshoñ kī chādar oḌh kar dahlīz utrī thī

ki maiñ ne ḳhud ko

bachpan aur javānī ke gunāhoñ kī hazāroñ lazzatoñ se

kis tarah mahrūm rakkhā hai

mirī jaañ maiñ ye sab kuchh bhuul jaanā chāhtī thī

maiñ terī nannhī nannhī uñgliyoñ kī koñpaloñ kā lams pā kar raqs kar uThtī

tirī kilkāriyoñ ko soch kar tanhā.ī meñ haule se muskātī

magar yuuñ hai ki mere chaar sū jo hashr barpā hai

bas ik ḳhāmosh mātam ek be-āvāz naala hai

maiñ āñkheñ mūñdnā chāhūñ to ye kilkāriyāñ

bhūke bilakte dard se behāl bachche kī karāhoñ meñ

badal jaatī haiñ pal bhar meñ

mirī muskān Dhal jaatī hai

tanhā dard kī maarī thakī haarī huī aurat kī aahoñ meñ

thakī haarī huī aurat ki jis kī sard bāñhoñ meñ

apāhij din sisaktā hai

musalsal ḳhāna-jañgī qahat-sālī bhuuk ġhurbat aur vabā.eñ

jis ke darvāze pe dastak de rahī haiñ

jihālat aur nafrat sarhadoñ kī pāsbānī kar rahī hai

jahāñ khetoñ meñ bas bārūd ugtā hai

saroñ par tāb-kārī dhuup kī chādar tanī hai

thakī haarī huī aurat jo malbe par khaḌī fariyād karte

ye kin ābādiyoñ ko yaad kartī hai

maiñ āñkheñ mūñdnā chāhūñ to ye manzar rulātā hai

mirī jaañ us ghaḌī tū jis bhī pahlū kasmasātā hai

mirā dil haul khātā hai

mire chāroñ taraf ik ḳhud-farāmoshī kā jañgal hai

ġhanīm āñkheñ jamā.e aur havā-e-shauq pāgal hai

suno

tum ne mujhe takmil ka ehsas baKHsha hai

ki tum is jism mein pahli tamanna ka shagufa ho

magar yun hai

ki meri kokh mein kilkariyon ki karwaTon se qabl

andeshe ki konpal phuT nikli hai

main aksar sochti thi ye akela ghar kabhi aabaad bhi hoga

main us an-dekhe mehman ki pazirai mein kya kya KHwab bhejungi

main taq-e-jaan mein kaise kaise gul-buTe sajaungi

main us ki ek ek jumbish pe izhaar-o-bayan ke sab dariche khol kar

sawan ke baadal ki tarah

har rang mein pagal hawa ke sath har su phail jaungi

main ye bhi bhul jaungi

ki us ek bund bhar rishte ke pichhe umr bhar ki sangsari hi muqaddar hai

main ye bhi bhul jaungi

ki is hone ki lazzat aur zillat ne mujhe kya kya rulaya hai

main ye bhi bhul jaana chahti thi

ki main kis jabr ke sae mein pal kar

kaise andeshon ki chadar oDh kar dahliz utri thi

ki main ne KHud ko

bachpan aur jawani ke gunahon ki hazaron lazzaton se

kis tarah mahrum rakkha hai

meri jaan main ye sab kuchh bhul jaana chahti thi

main teri nannhi nannhi ungliyon ki konpalon ka lams pa kar raqs kar uThti

teri kilkariyon ko soch kar tanhai mein haule se muskati

magar yun hai ki mere chaar su jo hashr barpa hai

bas ek KHamosh matam ek be-awaz nala hai

main aankhen mundna chahun to ye kilkariyan

bhuke bilakte dard se behaal bachche ki karahon mein

badal jati hain pal bhar mein

meri muskan Dhal jati hai

tanha dard ki mari thaki haari hui aurat ki aahon mein

thaki haari hui aurat ki jis ki sard banhon mein

apahij din sisakta hai

musalsal KHana-jangi qahat-sali bhuk ghurbat aur wabaen

jis ke darwaze pe dastak de rahi hain

jihaalat aur nafrat sarhadon ki pasbani kar rahi hai

jahan kheton mein bas barud ugta hai

saron par tab-kari dhup ki chadar tani hai

thaki haari hui aurat jo malbe par khaDi fariyaad karte

ye kin aabaadiyon ko yaad karti hai

main aankhen mundna chahun to ye manzar rulata hai

meri jaan us ghaDi tu jis bhi pahlu kasmasata hai

mera dil haul khata hai

mere chaaron taraf ek KHud-faramoshi ka jangal hai

ghanim aankhen jamae aur hawa-e-shauq pagal hai