pahli maut

raat bhar narm havāoñ ke jhoñke

vaqt kī mauj ravāñ par bahte

terī yādoñ ke safīne laa.e

ki jazīroñ se nikal kar aa.e

guzrā vaqt kā dāman thāme

tirī yādeñ tire ġham ke saa.e

ek ik harf-e-vafā kī ḳhushbū

mauja-e-gul meñ simaT kar aa.e

ek ik ahd-e-vafā kā manzar

ḳhvāb kī tarah guzarte bādal

terī qurbat ke mahakte hue pal

mere dāman se lipaTne aa.e

niiñd ke baar se bojhal āñkheñ

gard-e-ayyām se dhundlā.e hue

ek ik naqsh ko hairat se takeñ

lekin ab un se mujhe kyā lenā

mere kis kaam ke ye nazrāne

ek chhoḌī huī duniyā ke safīr

mere ġham-ḳhāne meñ phir kyuuñ aa.e

dard kā rishta rifāqat kī lagan

ruuh kī pyaas mohabbat ke chalan

maiñ ne muñh moḌ liyā hai sab se

maiñ ne duniyā ke taqāze samjhe

ab mere paas koī kyuuñ aa.e

raat bhar nauha-kunāñ yaad kī biphrī maujeñ

mere ḳhāmosh dar o baam se Takrātī haiñ

mere siine ke har ik zaḳhm ko sahlātī hai

mujhe ehsās kī us maut par sah de kar

sub.h ke saath nigūñ saar palaT jaatī hai

raat bhar narm hawaon ke jhonke

waqt ki mauj rawan par bahte

teri yaadon ke safine lae

ki jaziron se nikal kar aae

guzra waqt ka daman thame

teri yaaden tere gham ke sae

ek ek harf-e-wafa ki KHushbu

mauja-e-gul mein simaT kar aae

ek ek ahd-e-wafa ka manzar

KHwab ki tarah guzarte baadal

teri qurbat ke mahakte hue pal

mere daman se lipaTne aae

nind ke bar se bojhal aankhen

gard-e-ayyam se dhundlae hue

ek ek naqsh ko hairat se taken

lekin ab un se mujhe kya lena

mere kis kaam ke ye nazrane

ek chhoDi hui duniya ke safir

mere gham-KHane mein phir kyun aae

dard ka rishta rifaqat ki lagan

ruh ki pyas mohabbat ke chalan

main ne munh moD liya hai sab se

main ne duniya ke taqaze samjhe

ab mere pas koi kyun aae

raat bhar nauha-kunan yaad ki biphri maujen

mere KHamosh dar o baam se Takraati hain

mere sine ke har ek zaKHm ko sahlati hai

mujhe ehsas ki us maut par sah de kar

subh ke sath nigun sar palaT jati hai