क्राइसिस

naddiyāñ mere qadmoñ ke nīche se bahtī chalī jā rahī haiñ

pahāḌ mere ghuTnoñ

aur daraḳht mere roñgToñ par rashk kar rahe haiñ

phailī huī zamīn par maiñ kitnā ūñchā ho gayā huuñ

chāñd mere māthe par hai

aur sūraj hāthoñ kā khilaunā hai

ḳhudā merī khopaḌī ke andar chamgādaḌ kī tarah phaḌphaḌā rahā hai

samundar merā paañv chuum rahe haiñ

aur tahzībeñ tez-o-tund havāoñ kī tarah sansanāhaT paidā kar rahī haiñ

ki maiñ zamīn ko haath meñ le kar is tarah uchhāl saktā huuñ

jaise bachche geñd uchhālā karte haiñ

hazāroñ baras se maiñ ne yahī ḳhvāb dekhā thā ki maiñ ḳhudā ho jaatā

ab mujhe ḳhudā rahnā bhī gavāra nahīñ

logoñ ne mere qadmoñ pe sar rakh diye haiñ

lekin merā sar jo ab ek baḌā sā bojh ban gayā hai

ise maiñ kahāñ rakkhūñ

jannat mere dāhne haath meñ hai

aur dozaḳh baa.eñ haath meñ

aur sar par nuur kā taaj hai

farishte mere chāroñ taraf haiñ

lekin ab maiñ kyā karūñ

mujhe to Dar lagtā hai ki

ab maiñ būḌhā ho gayā huuñ

naddiyan mere qadmon ke niche se bahti chali ja rahi hain

pahaD mere ghuTnon

aur daraKHt mere rongTon par rashk kar rahe hain

phaili hui zamin par main kitna uncha ho gaya hun

chand mere mathe par hai

aur suraj hathon ka khilauna hai

KHuda meri khopaDi ke andar chamgadaD ki tarah phaDphaDa raha hai

samundar mera panw chum rahe hain

aur tahziben tez-o-tund hawaon ki tarah sansanahaT paida kar rahi hain

ki main zamin ko hath mein le kar is tarah uchhaal sakta hun

jaise bachche gend uchhaala karte hain

hazaron baras se main ne yahi KHwab dekha tha ki main KHuda ho jata

ab mujhe KHuda rahna bhi gawara nahin

logon ne mere qadmon pe sar rakh diye hain

lekin mera sar jo ab ek baDa sa bojh ban gaya hai

ise main kahan rakkhun

jannat mere dahne hath mein hai

aur dozaKH baen hath mein

aur sar par nur ka taj hai

farishte mere chaaron taraf hain

lekin ab main kya karun

mujhe to Dar lagta hai ki

ab main buDha ho gaya hun