paikar

badan meñ mīThe mīThe dard kī ḳhushbū basī hai

thakan chādar banī lipTī huī hai

sunahrī shahd jaisī niiñd

palkoñ ko baham joḌe hue

ḳhvāboñ ke jhūle meñ

abhī kuchh aur peñgeñ chāhtī hai

nīm-tārīkī khiñche pardoñ se lag kar ūñghtī hai

kiran dahlīz par Thahrī huī hai

mulā.em sā ujālā zid meñ aa kar

khiḌkiyoñ par dastakeñ detā chalā jaatā hai

khaT khaT khaT

uTho ki zindagī kī razm-gāheñ muntazir haiñ

razm-gāheñ

jin meñ dil mazbūt kar ke kuud paḌnā hai

ka.ī jihtoñ meñ laḌnā hai

sabhī apnī baqā kī jang meñ masrūf haiñ

ārām-o-itmīnān kaisā

baqā kī jang meñ ġhaflat kī gunjā.ish nahīñ hai

hamārī zindagī meñ niiñd aur ḳhvāboñ kī āsā.ish nahīñ hai

badan mein miThe miThe dard ki KHushbu basi hai

thakan chadar bani lipTi hui hai

sunahri shahd jaisi nind

palkon ko baham joDe hue

KHwabon ke jhule mein

abhi kuchh aur pengen chahti hai

nim-tariki khinche pardon se lag kar unghti hai

kiran dahliz par Thahri hui hai

mulaem sa ujala zid mein aa kar

khiDkiyon par dastaken deta chala jata hai

khaT khaT khaT

uTho ki zindagi ki razm-gahen muntazir hain

razm-gahen

jin mein dil mazbut kar ke kud paDna hai

kai jihton mein laDna hai

sabhi apni baqa ki jang mein masruf hain

aaram-o-itminan kaisa

baqa ki jang mein ghaflat ki gunjaish nahin hai

hamari zindagi mein nind aur KHwabon ki aasaish nahin hai