palaT aao

palaT aao

ki ḳhvāboñ kī zamīnoñ par

kisī duniyā kā shahzāda

ka.ī qarnoñ

ka.ī sadiyoñ se terī yaad kī chhāñv meñ baiThā hai

use izn-e-huzūrī do

ki us kī munjamid barfāb āñkhoñ meñ ḳhushī kī titliyāñ utreñ

palaT aao

ki ab bhī shahr kī galiyāñ

tumhāre paaoñ kī hiddat pe martī

bas tumheñ āvāz detī haiñ

diye har aane vaale se

tum.hārā pūchhte haiñ

aur darvāze tumhārī āhaToñ meñ gum magar tum

dūriyoñ ke shahr se bhī

duur baiThe ho

jahāñ āvāz bhī jaane se Dartī hai

palaT aao

ki ab bhī rāste ummīd kī ḳhushbū se mahke haiñ

ki tanhā.ī

hamārī ruuh ke sāhil pe jab bhī bain kartī hai

tumhārā naam letī hai

havā jab gungunātī hai

to us ke surma.ī hoñToñ se

tere dard meñ Duube hue lamhoñ kī kachchī bor uḌtī hai

palaT aao

ki ab ham devtāoñ kī tarah ḳhāmosh rah rah kar

tumhāre hijr ke āzār sah sah kar

bahut hī thak chuke haiñ

hameñ ab niiñd ke lambe safar par lauT jaanā hai

jahāñ ham ne zamāne kī nigāhoñ se pare

ik aur hī manzar basānā hai

palaT aao

ki ye lamhe hamārā maañs khāne par tule haiñ

zindagī bārūd ban kar jism-o-jāñ meñ dauḌtī hai

aañkh pathrā.ī huī hai

haath shal haiñ

aur ham pe maut sī chhā.ī huī hai

palaT aao

ki dil kī dhaḌkaneñ ab bhī

tumhāre naam kī tasbīh

sub.h shaam paḌhtī haiñ

palaT aao

ki KHwabon ki zaminon par

kisi duniya ka shahzada

kai qarnon

kai sadiyon se teri yaad ki chhanw mein baiTha hai

use izn-e-huzuri do

ki us ki munjamid barfab aankhon mein KHushi ki titliyan utren

palaT aao

ki ab bhi shahr ki galiyan

tumhaare paon ki hiddat pe marti

bas tumhein aawaz deti hain

diye har aane wale se

tumhaara puchhte hain

aur darwaze tumhaari aahaTon mein gum magar tum

duriyon ke shahr se bhi

dur baiThe ho

jahan aawaz bhi jaane se Darti hai

palaT aao

ki ab bhi raste ummid ki KHushbu se mahke hain

ki tanhai

hamari ruh ke sahil pe jab bhi bain karti hai

tumhaara nam leti hai

hawa jab gungunati hai

to us ke surmai honTon se

tere dard mein Dube hue lamhon ki kachchi bor uDti hai

palaT aao

ki ab hum dewtaon ki tarah KHamosh rah rah kar

tumhaare hijr ke aazar sah sah kar

bahut hi thak chuke hain

hamein ab nind ke lambe safar par lauT jaana hai

jahan hum ne zamane ki nigahon se pare

ek aur hi manzar basana hai

palaT aao

ki ye lamhe hamara mans khane par tule hain

zindagi barud ban kar jism-o-jaan mein dauDti hai

aankh pathrai hui hai

hath shal hain

aur hum pe maut si chhai hui hai

palaT aao

ki dil ki dhaDkanen ab bhi

tumhaare nam ki tasbih

subh sham paDhti hain