panah-KHwahon ke markaz mein saneha

vahī zar-kār zulfeñ thiiñ

vahī afrangiyoñ kī nīlgūñ āñkheñ

koī mahrūm-e-taḳht-o-tāj shahzādī

kisī luuTī huī bastī kī barbādī

panah-ḳhvāhoñ ke markaz meñ khaḌī thī

ik ḳhayāl-e-zard kī sūrat

sharār-e-sard kī sūrat

vo un rāhoñ se aa.ī thī jahāñ par ġhol phirte haiñ

jahāñ dukh dandanāte haiñ jahāñ par haul phirte haiñ

jise us ke badan se jo milā us kā uThā kar le gayā thā

koī baazū koī gardan koī siina churā kar le gayā thā

vufūr-e-shauq se maiñ us kī jānib haath phailā.e baḌhā

abhī maiñ us ko apnā jaan kar do bol hamdardī ke bolūñgā

magar ye soch kar maiñ Dar gayā

mire qadmoñ se us ke jism tak kā fāsla jaise lahū se bhar gayā

vo nasrānī nikal aa.ī to paḌhne vaalī girheñ maiñ kaise kholūñgā

panah-ḳhvāhoñ ke markaz meñ

numā.inda thā maiñ markaz kā

vo faqat ik posnī ma.asūm laḌkī thī

wahi zar-kar zulfen thin

wahi afrangiyon ki nilgun aankhen

koi mahrum-e-taKHt-o-taj shahzadi

kisi luTi hui basti ki barbaadi

panah-KHwahon ke markaz mein khaDi thi

ek KHayal-e-zard ki surat

sharar-e-sard ki surat

wo un rahon se aai thi jahan par ghol phirte hain

jahan dukh dandanate hain jahan par haul phirte hain

jise us ke badan se jo mila us ka uTha kar le gaya tha

koi bazu koi gardan koi sina chura kar le gaya tha

wufur-e-shauq se main us ki jaanib hath phailae baDha

abhi main us ko apna jaan kar do bol hamdardi ke bolunga

magar ye soch kar main Dar gaya

mere qadmon se us ke jism tak ka fasla jaise lahu se bhar gaya

wo nasrani nikal aai to paDhne wali girhen main kaise kholunga

panah-KHwahon ke markaz mein

numainda tha main markaz ka

wo faqat ek posni masum laDki thi