pand-nama

ai majāz ai tarāna-bār majāz

zinda paiġhambar-e-bahār majāz

ai barū-e-saman-vishāñ gul-posh

ai ba kū-e-muġhāñ tamām ḳharosh

ai parastār-e-mah-ruḳhān-e-jahāñ

ai kamāñ-dār-e-shā.irān-e-javāñ

tujh se tābāñ jabīn-e-mustaqbil

ai mire sīna-e-umīd ke dil

ai majāz ai mubassir-e-ḳhad-o-ḳhāl

ai shu.ūr-e-jamāl o sham-e-ḳhayāl

ai surayyā-fareb o zohra-navāz

shā.ir-e-mast o rind-e-shāhid-bāz

nāqid-e-ishva-e-shabāb hai tū

sub.h-e-fardā kā āftāb hai tū

tujh ko aayā huuñ aaj samjhāne

haif hai tū agar burā maane

ḳhud ko ġharq-e-sharāb-e-nāb na kar

dekh apne ko yuuñ ḳharāb na kar

shā.irī ko tirī zarūrat hai

daur-e-fardā kī tū amānat hai

sirf terī bhalā.ī ko ai jaañ

ban ke aayā huuñ nāseh-e-nādāñ

ek Thahrāv ik takān hai tū

dekh kis darja dhān-pān hai tū

nañg hai mahz ustuḳhāñ honā

saḳht ihānat hai nā-tavāñ honā

ustuḳhvānī badan duḳhānī post

ek sañgīn jurm hai ai dost

sharm kī baat hai vajūd-e-saqīm

nā-tavānī hai ik gunāh-e-azīm

jism aur ilm turfa tāqat hai

yahī insān kī nubuvvat hai

jo za.īf-o-alīl hotā hai

ishq meñ bhī zalīl hotā hai

har hunar ko jo ek daulat hai

ilm aur jism kī zarūrat hai

kasrat-e-bāda rañg laatī hai

aadmī ko lahū rulātī hai

ḳhush-diloñ ko rulā ke hañstī hai

sham-e-aḳhtar bujhā ke hañstī hai

aur jab aafat jigar pe laatī hai

riñd ko maulvī banātī hai

mai se hotā hai maqsad-e-dil faut

mai hai buniyād-e-maulviyyat-o-maut

kaan meñ sun ye baat hai nashtar

maulviyyat hai maut se bad-tar

is se hotā hai kār-e-umr tamām

is se hotā hai aql ko sarsām

is meñ insāñ kī jaan jaatī hai

is meñ shā.ir kī aan jaatī hai

ye zamīn āsmān kyā shai hai

aan jaa.e to jaan kyā shai hai

gauhar-e-shāh-vār chun pyāre

mujh se ik gur kī baat sun pyāre

ġham to bantā hai chaar din meñ nashāt

shādmānī se rah bahut mohtāt

ġham ke maare to jī rahe haiñ hazār

nahīñ bachte haiñ aish ke bīmār

aan meñ dil ke paar hotī hai

pañkhuḌī meñ vo dhaar hotī hai

jū-e-ishrat meñ ġham ke dhāre haiñ

yaḳh-o-shabnam meñ bhī sharāre haiñ

haañ sambhal kar latāfatoñ ko barat

TuuT jaa.e kahīñ na koī parat

dekh kar shīsha-e-nashāt uThā

ye varaq hai varaq hai sone kā

kāġhaz-e-bād ye nagīna hai

balki ai dost ābgīna hai

sāġhar-e-shabnam-e-ḳhush-āb hai ye

ābgīna nahīñ habāb hai ye

rok le saañs jo qarīb aa.e

Thes us ko kahīñ na lag jaa.e

teġh-e-mastī ko ehtiyāt se chhū

varna Tapkegā uñgliyoñ se lahū

mastiyoñ meñ hai tāb-e-jalva-e-māh

aur siyah mastiyāñ ḳhudā kī panāh

ḳhuub hai ek had pe qaa.em nasha

halkā phulkā subuk mulā.em nasha

haañ adab se uThā adab se jaam

taaki āb-e-halāl ho na harām

jaam par jaam jo chaḌhāte haiñ

uuñT kī tarah bilbilāte haiñ

zindagī kī havas meñ marte haiñ

mai ko rusvā-e-dahr karte haiñ

yaad hai jab 'jigar' chaḌhāte the

kyā alif ho ke hin-hināte the

merī gardan meñ bhar ke chand aaheñ

paañv se Dālte the vo bāñheñ

aql kī maut ilm kī pastī

al-amāñ la.anat-e-siyah mastī

uf ghaTā-Top nashshe kā tūfān

bhuut ifrīt dev jin shaitān

laat ghūñsa chhaḌī chhurī chāqū

lib-libāhaT luaab kaf badbū

tanz āvāza barhamī ifsād

ta.an tashnī.a maz.haka īrād

shor hū-haq abe-tabe hai hai

aukhiyāñ gāliyāñ dhamāke qai

mas-masāhaT ġhashī tapish chakkar

soz sailāb sansanī sarsar

chal-chaḳhe chīḳh chunāñ-chunīñ chiñghāḌ

chaḳh-chaḳhe chā.ūñ chā.ūñ chīl-chilhāḌ

lappā-Dukki latām laam laḌā.ī

haul haijān haañk hāthā-pā.ī

khalbalī kaaoñ kaaoñ khaT-manDal

hauñk hañgāma hamhama halchal

uljhan āvārgī udham aiThan

bhauñk bhauñ bhauñ bhinan bhinan bhan-bhan

dhaul-dhappā dhakaḌ-pakaḌ dhutkār

tahlka tū taḌāq tuf takrār

bū bhabhak bhay bikas barar bhauñchāl

dabdabe dandanāhaTeñ dhammāl

gaah narmī o lutf o mehr o salām

gaah talḳhī o turshī o dushnām

aql kī maut ilm kī pastī

al-amāñ la.anat-e-siyah mastī

sirf nashshe kī bhīgne de maseñ

in ko banñe na de kabhī moñchheñ

al-amāñ ḳhaufnāk kaalā nasha

oh rīsh-o-burūt vaalā nasha

azhdar-e-marg o dev-e-ḳhūñ-ḳhvārī

al-amāñ nashsha-e-''jaTādhārī''

nashshe kā jhuT-puTā hai nūr-e-hayāt

jhuTpuTe ko banā na kaalī raat

nashshe kī tez raushnī bhī ġhalat

chaudhvīñ kī sī chāñdnī bhī ġhalat

zehn-e-insāñ ko baḳhshtā hai jamāl

nashsha ho jab ye qadr-e-nūr-e-hilāl

ġhurfa-e-aql bheḌ to akasr

par use kach-kachā ke band na kar

raat ko lutf-e-jām hai pyāre

din kā piinā harām hai pyāre

din hai ifrīt-e-āz kī khankār

raat pāzeb nāzukī jhankār

din hai ḳhāshāk ḳhaak dhuul dhuāñ

raat ā.īna anjuman afshāñ

din musallah davāñ kamar basta

raat tāq-o-ravāq-o-gul-dasta

din hai faulād-e-sañg teġh-e-alam

raat kam-ḳhvāb pañkhuḌī shabnam

din hai shevan duhā.iyāñ dukhḌe

raat mast añkhḌiyāñ javāñ mukhḌe

din kaḌī dhuup kī bad-āhañgī

raat pichhle pahar kī sārañgī

din bahādur kā baan biir kī rath

raat champā-kalī añgūThī nath

din hai tūfān-e-jumbish-o-raftār

raat mīzān-e-kākul-o-ruḳhsār

āftāb-o-sharāb haiñ bairī

botaleñ din ko haiñ pachhal pairī

kar na pāmāl hurmat-e-auqāt

raat ko din banā na din ko raat

pī magar sirf shaam ke hañgām

aur vo bhī ba-qadr-e-yak-do jaam

vahī insāñ hai ḳhurram-o-ḳhursand

jo hai miqdār o vaqt kā pāband

mere piine hī par na jā mirī jaañ

mujh se jiinā bhī siikh haiñ qurbāñ

us ke piine meñ rañg aatā hai

jis ko jiine kā Dhañg aatā hai

ye nasā.eh bahut haiñ besh-bahā

jald so jald jaag jald nahā

baaġh meñ jā tulūa se pahle

tā nigār-e-sahar se dil bahle

sarv-o-shamshād ko gale se lagā

har chaman-zād ko gale se lagā

muñh añdhere fazā-e-gulshan dekh

sāhil o sabza-zār o sausan dekh

gaah āvāra abr-pāre dekh

in kī raftār meñ sitāre dekh

jaise kohre meñ tāb-e-rū-e-nikū

jaise jañgal meñ raat ko jugnū

gul kā muñh chuum ik tarannum se

nahr ko gudgudā tabassum se

jism ko kar araq se nam-ālūd

taaki shabnam paḌhe lahak ke darūd

pheñk sanjīdgī kā sar se baar

naach uchhal dandanā chhalāñgeñ maar

dekh āb-e-ravāñ kā ā.īna

dauḌ sāhil pe taan kar siina

mast chiḌiyoñ kā chahchahānā sun

mauj-e-nau-mashq kā tarāna sun

bostāñ meñ sabā kā chalnā dekh

sabza o sarv kā machalnā dekh

shabnam-ālūd kar suḳhan kā libās

chakh dhundalke meñ bū-e-gul kī miThās

shā.irī ko khilā havā-e-sahar

is kā nafqa hai terī gardan par

raqs kī lahr meñ ho gum lab-e-nahr

yuuñ adā kar urūs-e-sher kā mahr

jazb kar bostāñ ke naqsh-o-nigār

zehan meñ khol misr kā bāzār

narm jhoñkoñ kā āb-e-haivāñ pī

bū-e-gul rañg-e-shabnamistāñ pī

gun-gunā kar nazar uThā kar pī

sub.h kā shiir daġhdaġha kar pī

taaki mujre ko aa.eñ kul barkāt

daulat jism o ilm o aql o hayāt

ye na ta.ana na ye ulahnā hai

ek nukta bas aur kahnā hai

ġhaibat-e-nūr ho ki kasrat-e-nūr

zulmat-e-tām ho ki sho.ala-e-tūr

ek sā hai vabāl donoñ kā

tīrgī hai ma.aal donoñ kā

darḳhur-e-sāhab-e-ma.āl nahīñ

har vo shai jis meñ e'tidāl nahīñ

shādmānī se pī nahīñ saktā

jis ko haukā ho jī nahīñ saktā

ai pisar ai barādar ai hamrāz

ban na is tarah duur kī āvāz

koī bīmār tan nahīñ saktā

ḳhādim-e-ḳhalq ban nahīñ saktā

ḳhidmat-e-ḳhalq farz hai tujh par

daur-e-māzī kā qarz hai tujh par

asr-e-hāzir ke shā.ir-e-ḳhuddār

qarz-dārī kī maut se hoshyār

zehn-e-insāniyat ubhār ke jā

zindagānī kā qarz utaar ke jā

tujh pe hindostān naaz kare

umr terī ḳhudā darāz kare

ai majaz ai tarana-bar majaz

zinda paighambar-e-bahaar majaz

ai baru-e-saman-wishan gul-posh

ai ba ku-e-mughan tamam KHarosh

ai parastar-e-mah-ruKHan-e-jahan

ai kaman-dar-e-shairan-e-jawan

tujh se taban jabin-e-mustaqbil

ai mere sina-e-umid ke dil

ai majaz ai mubassir-e-KHad-o-KHal

ai shuur-e-jamal o sham-e-KHayal

ai surayya-fareb o zohra-nawaz

shair-e-mast o rind-e-shahid-baz

naqid-e-ishwa-e-shabab hai tu

subh-e-farda ka aaftab hai tu

tujh ko aaya hun aaj samjhane

haif hai tu agar bura mane

KHud ko gharq-e-sharab-e-nab na kar

dekh apne ko yun KHarab na kar

shairi ko teri zarurat hai

daur-e-farda ki tu amanat hai

sirf teri bhalai ko ai jaan

ban ke aaya hun naseh-e-nadan

ek Thahraw ek takan hai tu

dekh kis darja dhan-pan hai tu

nang hai mahz ustuKHan hona

saKHt ihanat hai na-tawan hona

ustuKHwani badan duKHani post

ek sangin jurm hai ai dost

sharm ki baat hai wajud-e-saqim

na-tawani hai ek gunah-e-azim

jism aur ilm turfa taqat hai

yahi insan ki nubuwwat hai

jo zaif-o-alil hota hai

ishq mein bhi zalil hota hai

har hunar ko jo ek daulat hai

ilm aur jism ki zarurat hai

kasrat-e-baada rang lati hai

aadmi ko lahu rulati hai

KHush-dilon ko rula ke hansti hai

sham-e-aKHtar bujha ke hansti hai

aur jab aafat jigar pe lati hai

rind ko maulwi banati hai

mai se hota hai maqsad-e-dil faut

mai hai buniyaad-e-maulwiyyat-o-maut

kan mein sun ye baat hai nashtar

maulwiyyat hai maut se bad-tar

is se hota hai kar-e-umr tamam

is se hota hai aql ko sarsam

is mein insan ki jaan jati hai

is mein shair ki aan jati hai

ye zamin aasman kya shai hai

aan jae to jaan kya shai hai

gauhar-e-shah-war chun pyare

mujh se ek gur ki baat sun pyare

gham to banta hai chaar din mein nashat

shadmani se rah bahut mohtat

gham ke mare to ji rahe hain hazar

nahin bachte hain aish ke bimar

aan mein dil ke par hoti hai

pankhuDi mein wo dhaar hoti hai

ju-e-ishrat mein gham ke dhaare hain

yaKH-o-shabnam mein bhi sharare hain

han sambhal kar latafaton ko barat

TuT jae kahin na koi parat

dekh kar shisha-e-nashat uTha

ye waraq hai waraq hai sone ka

kaghaz-e-baad ye nagina hai

balki ai dost aabgina hai

saghar-e-shabnam-e-KHush-ab hai ye

aabgina nahin habab hai ye

rok le sans jo qarib aae

Thes us ko kahin na lag jae

tegh-e-masti ko ehtiyat se chhu

warna Tapkega ungliyon se lahu

mastiyon mein hai tab-e-jalwa-e-mah

aur siyah mastiyan KHuda ki panah

KHub hai ek had pe qaem nasha

halka phulka subuk mulaem nasha

han adab se uTha adab se jam

taki aab-e-halal ho na haram

jam par jam jo chaDhate hain

unT ki tarah bilbilate hain

zindagi ki hawas mein marte hain

mai ko ruswa-e-dahr karte hain

yaad hai jab 'jigar' chaDhate the

kya alif ho ke hin-hinate the

meri gardan mein bhar ke chand aahen

panw se Dalte the wo banhen

aql ki maut ilm ki pasti

al-aman lanat-e-siyah masti

uf ghaTa-Top nashshe ka tufan

bhut ifrit dew jin shaitan

lat ghunsa chhaDi chhuri chaqu

lib-libahaT luab kaf badbu

tanz aawaza barhami ifsad

tan tashnia mazhaka irad

shor hu-haq abe-tabe hai hai

aukhiyan galiyan dhamake qai

mas-masahaT ghashi tapish chakkar

soz sailab sansani sarsar

chal-chaKHe chiKH chunan-chunin chinghaD

chaKH-chaKHe chaun chaun chil-chilhaD

lappa-Dukki latam lam laDai

haul haijaan hank hatha-pai

khalbali kaon kaon khaT-manDal

haunk hangama hamhama halchal

uljhan aawargi udham aiThan

bhaunk bhaun bhaun bhinan bhinan bhan-bhan

dhaul-dhappa dhakaD-pakaD dhutkar

tahlka tu taDaq tuf takrar

bu bhabhak bhay bikas barar bhaunchaal

dabdabe dandanahaTen dhammal

gah narmi o lutf o mehr o salam

gah talKHi o turshi o dushnam

aql ki maut ilm ki pasti

al-aman lanat-e-siyah masti

sirf nashshe ki bhigne de masen

in ko banne na de kabhi monchhen

al-aman KHaufnak kala nasha

oh rish-o-burut wala nasha

azhdar-e-marg o dew-e-KHun-KHwari

al-aman nashsha-e-jaTadhaari

nashshe ka jhuT-puTa hai nur-e-hayat

jhuTpuTe ko bana na kali raat

nashshe ki tez raushni bhi ghalat

chaudhwin ki si chandni bhi ghalat

zehn-e-insan ko baKHshta hai jamal

nashsha ho jab ye qadr-e-nur-e-hilal

ghurfa-e-aql bheD to akasr

par use kach-kacha ke band na kar

raat ko lutf-e-jam hai pyare

din ka pina haram hai pyare

din hai ifrit-e-az ki khankar

raat pazeb nazuki jhankar

din hai KHashak KHak dhul dhuan

raat aaina anjuman afshan

din musallah dawan kamar basta

raat taq-o-rawaq-o-gul-dasta

din hai faulad-e-sang tegh-e-alam

raat kam-KHwab pankhuDi shabnam

din hai shewan duhaiyan dukhDe

raat mast ankhDiyan jawan mukhDe

din kaDi dhup ki bad-ahangi

raat pichhle pahar ki sarangi

din bahadur ka ban bir ki rath

raat champa-kali anguThi nath

din hai tufan-e-jumbish-o-raftar

raat mizan-e-kakul-o-ruKHsar

aaftab-o-sharab hain bairi

botalen din ko hain pachhal pairi

kar na pamal hurmat-e-auqat

raat ko din bana na din ko raat

pi magar sirf sham ke hangam

aur wo bhi ba-qadr-e-yak-do jam

wahi insan hai KHurram-o-KHursand

jo hai miqdar o waqt ka paband

mere pine hi par na ja meri jaan

mujh se jina bhi sikh hain qurban

us ke pine mein rang aata hai

jis ko jine ka Dhang aata hai

ye nasaeh bahut hain besh-baha

jald so jald jag jald naha

bagh mein ja tulua se pahle

ta nigar-e-sahar se dil bahle

sarw-o-shamshad ko gale se laga

har chaman-zad ko gale se laga

munh andhere faza-e-gulshan dekh

sahil o sabza-zar o sausan dekh

gah aawara abr-pare dekh

in ki raftar mein sitare dekh

jaise kohre mein tab-e-ru-e-niku

jaise jangal mein raat ko jugnu

gul ka munh chum ek tarannum se

nahr ko gudguda tabassum se

jism ko kar araq se nam-alud

taki shabnam paDhe lahak ke darud

phenk sanjidgi ka sar se bar

nach uchhal dandana chhalangen mar

dekh aab-e-rawan ka aaina

dauD sahil pe tan kar sina

mast chiDiyon ka chahchahana sun

mauj-e-nau-mashq ka tarana sun

bostan mein saba ka chalna dekh

sabza o sarw ka machalna dekh

shabnam-alud kar suKHan ka libas

chakh dhundalke mein bu-e-gul ki miThas

shairi ko khila hawa-e-sahar

is ka nafqa hai teri gardan par

raqs ki lahr mein ho gum lab-e-nahr

yun ada kar urus-e-sher ka mahr

jazb kar bostan ke naqsh-o-nigar

zehan mein khol misr ka bazar

narm jhonkon ka aab-e-haiwan pi

bu-e-gul rang-e-shabnamistan pi

gun-guna kar nazar uTha kar pi

subh ka shir daghdagha kar pi

taki mujre ko aaen kul barkat

daulat jism o ilm o aql o hayat

ye na tana na ye ulahna hai

ek nukta bas aur kahna hai

ghaibat-e-nur ho ki kasrat-e-nur

zulmat-e-tam ho ki shoala-e-tur

ek sa hai wabaal donon ka

tirgi hai maal donon ka

darKHur-e-sahab-e-maal nahin

har wo shai jis mein e'tidal nahin

shadmani se pi nahin sakta

jis ko hauka ho ji nahin sakta

ai pisar ai baradar ai hamraaz

ban na is tarah dur ki aawaz

koi bimar tan nahin sakta

KHadim-e-KHalq ban nahin sakta

KHidmat-e-KHalq farz hai tujh par

daur-e-mazi ka qarz hai tujh par

asr-e-hazir ke shair-e-KHuddar

qarz-dari ki maut se hoshyar

zehn-e-insaniyat ubhaar ke ja

zindagani ka qarz utar ke ja

tujh pe hindostan naz kare

umr teri KHuda daraaz kare