panDora

mire sandūq meñ

kuchh bhī nahīñ thā chand socheñ thiiñ

bahut sī putliyāñ thiiñ aur āñkheñ thiiñ

jinheñ maiñ aañkh vāloñ kī dukāñ se maañg laayā thā

mire sandūq meñ ik martabāñ thā

jis meñ bādal the havā.eñ thiiñ kisī dariyā kī quvvat thī

maiñ apne dukh uThā kar sukh kī nagrī meñ chalā aaya

mire sandūq meñ ik aa.ina thā

jo mujhe chehre dikhātā

saat darzoñ par jo parde the

unheñ āhista āhista haTātā

ziist ke nange badan kī dāstāñ mujh ko sunātā muskurātā

mujhe ā.īna gintī bhī sikhātā

nau adad tak rok detā thā

mujhe ma.alūm thā

nau ke adad meñ ism-e-āzam hai

hayāt-e-nau isī nau ke adad kā rāz-e-sar-basta

ye nau din aur nau rātoñ kā ik rangīñ drama hai

phir is ke baad

ḳhālī sifr tak kuchh hone vaalā hai

mere sanduq mein

kuchh bhi nahin tha chand sochen thin

bahut si putliyan thin aur aankhen thin

jinhen main aankh walon ki dukan se mang laya tha

mere sanduq mein ek martaban tha

jis mein baadal the hawaen thin kisi dariya ki quwwat thi

main apne dukh uTha kar sukh ki nagri mein chala aaya

mere sanduq mein ek aaina tha

jo mujhe chehre dikhata

sat darzon par jo parde the

unhen aahista aahista haTata

zist ke nange badan ki dastan mujh ko sunata muskuraata

mujhe aaina ginti bhi sikhata

nau adad tak rok deta tha

mujhe malum tha

nau ke adad mein ism-e-azam hai

hayat-e-nau isi nau ke adad ka raaz-e-sar-basta

ye nau din aur nau raaton ka ek rangin drama hai

phir is ke baad

KHali sifr tak kuchh hone wala hai