parchhain ka safar

ye sach hai ki hāthoñ meñ tirshūl thāme

birāgī tumhīñ the

khule āsmāñ ko tumhīñ tak rahe the

hazāroñ baras tak tumhīñ devtāoñ ne kuchh na diyā us jazīre se tum lauT aa.e

usī dam purāne samundar ke kone meñ moñge chaTāneñ banāte hue thak ga.e the

unheñ machhliyāñ khā ga.ī thiiñ

anekoñ banoñ apūnoñ se guzartī huī dauḌtī sansanāhaT unheñ DhūñDne jā rahī thī

zamīñ ek chakkar lagā ke rukī thī

ki tum lauT aa.e

aur phir bhiik māñgī huī sīpiyoñ sard ghoñghoñ se tum ne ka.ī sar-phire but banā.e

magar ab kahāñ ho

sirishTi kahāñ hai!

yahāñ ek kamre meñ bijlī ke kaale plug kī chamaktī lakīroñ se do jhāñkte gol surāḳh

aur taak meñ gupt baiThī huī maut kī bhūk, lālach, havā meñ sulagtī huī sūkhtī tirishnā

kaun hai ....raushnī.... nahīñ piip ke Dher meñ ek luthḌī huī Dūbtī khopaḌī

do nishān malgaje ek ublā kahānī ke pīchhe bhaTakte hue sard suune safar kī bikastī bansī

kaun soche gulāb aur huuhī ke phūloñ kī mahkār raste se haT ke purānī huī bujh ga.ī

ik zamāna kināre kī ghaTnāoñ kā saath detā barkachhoñ se girtī huī pattiyoñ ko sameTe

bahāv se Darte hue āḳhirī jal meñ bahtā chalā jā rahā hai

suno āḳhirī jal tumhārā nahīñ hai kisī kā nahīñ hai!

dishāoñ ke bahrūp, ab hārte, hāñpte, TūTte jā rahe haiñ

inheñ itnā murda samajh lo ki dekhe binā chal paḌo aur chalte raho

jinheñ tum kahīñ bhuul se vaqt ke moḌ par chhoḌ aa.e

vo ab jā chuke haiñ

unheñ mat bulāo

yahāñ ek kamre kī khiḌkī meñ baiThe hue sochte ho ki āñkheñ tumhārī haiñ rachnā tumhārī

udhar muḌ ke dekho banā.e hue an-ginat rañg

shabdoñ ke sāñchoñ meñ Dhālī huī apsarā.eñ na.e farsh par Dagmagātī huī gir paḌī haiñ

savere kī nīlāhaTeñ gandagī meñ lapeTī huī chhāñv meñ ūñghtī haiñ

faqat makkhiyāñ uḌ rahī haiñ

ye sach hai ki hathon mein tirshul thame

biragi tumhin the

khule aasman ko tumhin tak rahe the

hazaron baras tak tumhin dewtaon ne kuchh na diya us jazire se tum lauT aae

usi dam purane samundar ke kone mein monge chaTanen banate hue thak gae the

unhen machhliyan kha gai thin

anekon banon apunon se guzarti hui dauDti sansanahaT unhen DhunDne ja rahi thi

zamin ek chakkar laga ke ruki thi

ki tum lauT aae

aur phir bhik mangi hui sipiyon sard ghonghon se tum ne kai sar-phire but banae

magar ab kahan ho

sirishTi kahan hai!

yahan ek kamre mein bijli ke kale plug ki chamakti lakiron se do jhankte gol suraKH

aur tak mein gupt baiThi hui maut ki bhuk, lalach, hawa mein sulagti hui sukhti tirishna

kaun hai raushni nahin pip ke Dher mein ek luthDi hui Dubti khopaDi

do nishan malgaje ek ubla kahani ke pichhe bhaTakte hue sard sune safar ki bikasti bansi

kaun soche gulab aur huhi ke phulon ki mahkar raste se haT ke purani hui bujh gai

ek zamana kinare ki ghaTnaon ka sath deta barkachhon se girti hui pattiyon ko sameTe

bahaw se Darte hue aaKHiri jal mein bahta chala ja raha hai

suno aaKHiri jal tumhaara nahin hai kisi ka nahin hai!

dishaon ke bahrup, ab haarte, hanpte, TuTte ja rahe hain

inhen itna murda samajh lo ki dekhe bina chal paDo aur chalte raho

jinhen tum kahin bhul se waqt ke moD par chhoD aae

wo ab ja chuke hain

unhen mat bulao

yahan ek kamre ki khiDki mein baiThe hue sochte ho ki aankhen tumhaari hain rachna tumhaari

udhar muD ke dekho banae hue an-ginat rang

shabdon ke sanchon mein Dhaali hui apsaraen nae farsh par Dagmagati hui gir paDi hain

sawere ki nilahaTen gandagi mein lapeTi hui chhanw mein unghti hain

faqat makkhiyan uD rahi hain