parchhaiyan

zarroñ ke dahakte aivāñ meñ

do sho.ala-ba-jāñ larzāñ saa.e

masrūf-e-nazā-e-bāham haiñ

uḌ uḌ ke ġhubār-e-rāh-e-adam

aivāñ ke band darīchoñ se

Takrā ke bikharte jaate haiñ

kohre meñ panaptī samtoñ se

nāzād havāoñ ke jhoñke

nādīda āhanī pardoñ par

rah rah ke jhapaTte rahte haiñ

ik pal do pul kī baat nahīñ

zarroñ ke mahal kī baat nahīñ

har resha-e-gul har sañg-e-girāñ

har mauj-e-ravāñ ke siine meñ

ye bint-e-azal aur bint-e-abad kī

sho.ala-ba-jāñ parchhā.iyāñ yuuñ hī

sar-garm-e-paikār na jaane kab se haiñ

aur ham haiñ ki sālik-e-rāh-e-baqā

hāthoñ meñ liye fānūs-e-fanā

zarroñ se gurezāñ

sūraj kī nāyāb shuāoñ ke armāñ

sīnoñ meñ chhupā.e jaate haiñ

ḳhud ko bahlā.e jaate haiñ

zarron ke dahakte aiwan mein

do shoala-ba-jaan larzan sae

masruf-e-naza-e-baham hain

uD uD ke ghubar-e-rah-e-adam

aiwan ke band darichon se

Takra ke bikharte jate hain

kohre mein panapti samton se

nazad hawaon ke jhonke

nadida aahani pardon par

rah rah ke jhapaTte rahte hain

ek pal do pul ki baat nahin

zarron ke mahal ki baat nahin

har resha-e-gul har sang-e-giran

har mauj-e-rawan ke sine mein

ye bint-e-azal aur bint-e-abad ki

shoala-ba-jaan parchhaiyan yun hi

sar-garm-e-paikar na jaane kab se hain

aur hum hain ki salik-e-rah-e-baqa

hathon mein liye fanus-e-fana

zarron se gurezan

suraj ki nayab shuaon ke arman

sinon mein chhupae jate hain

KHud ko bahlae jate hain