pardesi ka KHat

hamārī duurī ke mausamoñ ko

ai jān-e-jānāñ nisāb rakhnā

maiñ tum se milne ko ā.ūñgā jab

varaq varaq tum kitāb rakhnā

sabhī shikāyāt yaad kar ke

sazāoñ kā bhī hisāb rakhnā

ḳhalish hai jo bhī tumhāre dil meñ

mire liye intisāb rakhnā

savāl jitne hoñ dil meñ chubhte

unheñ farāġhat se pūchh lenā

mirī mohabbat kā paas karnā

mujhe mukammal javāb rakhnā

uThānā parde haqīqatoñ se

faqat na mahv-e-sarāb rakhnā

bichhaḌ ke tum se milan kī lazzat

thakan hamārī sameT lenā

firāq meñ phir jo deñ sahārā

hamāre hissa ye ḳhvāb rakhnā

na duur jaanā na hijr denā

na mujh ko ġharq-e-azāb rakhnā

hamāre lafzoñ pe ġhaur karnā

bichhaḌ ke tum se na chain paayā

ḳhamoshiyoñ ko na raah denā

na dil ko ḳhāna-ḳharāb rakhnā

rafāqatoñ ke bhañvar meñ mujh ko

Dubo Dubo ke ubhār denā

har ek lamha navāz denā

na mujh se koī hijāb rakhnā

tumhārī furqat ke karb kaaTe

maiñ qatra qatra bikhar rahā huuñ

tum apnī chāhat ko merī ḳhātir

ba-sūrat-e-injezāb rakhnā

jhulas chuke haiñ tamām jazbe

unheñ mohabbat se sīñch denā

zarā sī saḳhtī zarā sī narmī

misāl-e-āb-o-turāb rakhnā

tumhāre jazbāt kī sadāqat

vajūd par abr ban ke barse

nikhar sake zindagī kā mausam

mire liye ye savāb rakhnā

hamari duri ke mausamon ko

ai jaan-e-jaanan nisab rakhna

main tum se milne ko aaunga jab

waraq waraq tum kitab rakhna

sabhi shikayat yaad kar ke

sazaon ka bhi hisab rakhna

KHalish hai jo bhi tumhaare dil mein

mere liye intisab rakhna

sawal jitne hon dil mein chubhte

unhen faraghat se puchh lena

meri mohabbat ka pas karna

mujhe mukammal jawab rakhna

uThana parde haqiqaton se

faqat na mahw-e-sarab rakhna

bichhaD ke tum se milan ki lazzat

thakan hamari sameT lena

firaq mein phir jo den sahaara

hamare hissa ye KHwab rakhna

na dur jaana na hijr dena

na mujh ko gharq-e-azab rakhna

hamare lafzon pe ghaur karna

bichhaD ke tum se na chain paya

KHamoshiyon ko na rah dena

na dil ko KHana-KHarab rakhna

rafaqaton ke bhanwar mein mujh ko

Dubo Dubo ke ubhaar dena

har ek lamha nawaz dena

na mujh se koi hijab rakhna

tumhaari furqat ke karb kaTe

main qatra qatra bikhar raha hun

tum apni chahat ko meri KHatir

ba-surat-e-injezab rakhna

jhulas chuke hain tamam jazbe

unhen mohabbat se sinch dena

zara si saKHti zara si narmi

misal-e-ab-o-turab rakhna

tumhaare jazbaat ki sadaqat

wajud par abr ban ke barse

nikhar sake zindagi ka mausam

mere liye ye sawab rakhna