parinde

bāġhoñ meñ jab ashjār pe gaate haiñ parinde

mausam kā koī jashn manāte haiñ parinde

kohsār pe jab chaltī haiñ yaḳh-basta havā.eñ

mil kar sū-e-maidāñ utar aate haiñ parinde

uḌ jaate haiñ phir vādī-e-kohsār kī jānib

maidāñ meñ kaḌī dhuup jo paate haiñ parinde

chunte haiñ makāñ phūñs ke be-ḳhānumāñ kuchh log

yā ghoñsle tinkoñ ke banāte haiñ parinde

pahuñchāte haiñ nuqsān jo khetoñ ko janāvar

kīḌoñ se bhī fasloñ ko bachāte haiñ parinde

bachchoñ ke madāris meñ tarānoñ kā hai aalam

yā vaqt-e-sahar shor machāte haiñ parinde

saf bāñdh ke uḌte haiñ to insān ko ai 'zeb'

tanzīm ke ādāb sikhāte haiñ parinde

baghon mein jab ashjar pe gate hain parinde

mausam ka koi jashn manate hain parinde

kohsar pe jab chalti hain yaKH-basta hawaen

mil kar su-e-maidan utar aate hain parinde

uD jate hain phir wadi-e-kohsar ki jaanib

maidan mein kaDi dhup jo pate hain parinde

chunte hain makan phuns ke be-KHanuman kuchh log

ya ghonsle tinkon ke banate hain parinde

pahunchate hain nuqsan jo kheton ko janawar

kiDon se bhi faslon ko bachate hain parinde

bachchon ke madaris mein taranon ka hai aalam

ya waqt-e-sahar shor machate hain parinde

saf bandh ke uDte hain to insan ko ai 'zeb'

tanzim ke aadab sikhate hain parinde