parindon ko dhoka na do

vo martūb jhoñkā

jo bārish kā elān-nāma hai

gar aaj phir aa.e to ye batā.ūñ

ki vo bastiyāñ jin meñ harf-o-sadā ke parinde to agar the

ujḌe makāñ haiñ

jahāñ sirf vahshī havā.eñ hī phunkārtī haiñ

sabz malbūs pahne hue peḌ uriyāñ haiñ

aur un ke nīche faqat chand nuqte

jinheñ saaya kahnā bhī saa.e kī tauhīn hai

zard pattoñ ke dil

jise aaseb ke ḳhauf se bhaag jaane pe majbūr haiñ

har taraf ḳhushk patthar haiñ

jin kī ragoñ se koī qatra-e-āb Tapke

to goyā havā jaal meñ aa ga.ī ho

us se pūchhūñ

vo motī kahāñ haiñ

jinheñ pā ke murda zamīñ

reshmī sabz sī shaal oḌh le

āñganoñ meñ mahakte gulāboñ ke raushan diye jagmagā.eñ

saat rañgī kamāñ haath meñ le ke

niile falak ke samundar meñ mahv-e-safar devtā

apnā rath rok le

aur chaTTānoñ se jharnoñ kī āvāz

kānoñ meñ ras ghol de

vo parinde jo choñcheñ paroñ meñ dabā.e hue dam-ba-ḳhud haiñ

tumheñ dekh kar khil uTheñ

jānte haiñ

ki martūb jhoñkā akelā nahīñ

apne hamrāh bhīgī rutoñ ke sandese bhī laa.e

use ye kahūñ

tum harāaval nahīñ bārishoñ ke

to martūb jaama utāro

parindoñ ko dhokā na do

wo martub jhonka

jo barish ka elan-nama hai

gar aaj phir aae to ye bataun

ki wo bastiyan jin mein harf-o-sada ke parinde to agar the

ujDe makan hain

jahan sirf wahshi hawaen hi phunkarti hain

sabz malbus pahne hue peD uriyan hain

aur un ke niche faqat chand nuqte

jinhen saya kahna bhi sae ki tauhin hai

zard patton ke dil

jise aaseb ke KHauf se bhag jaane pe majbur hain

har taraf KHushk patthar hain

jin ki ragon se koi qatra-e-ab Tapke

to goya hawa jal mein aa gai ho

us se puchhun

wo moti kahan hain

jinhen pa ke murda zamin

reshmi sabz si shaal oDh le

aanganon mein mahakte gulabon ke raushan diye jagmagaen

sat rangi kaman hath mein le ke

nile falak ke samundar mein mahw-e-safar dewta

apna rath rok le

aur chaTTanon se jharnon ki aawaz

kanon mein ras ghol de

wo parinde jo chonchen paron mein dabae hue dam-ba-KHud hain

tumhein dekh kar khil uThen

jaante hain

ki martub jhonka akela nahin

apne hamrah bhigi ruton ke sandese bhi lae

use ye kahun

tum haraawal nahin barishon ke

to martub jama utaro

parindon ko dhoka na do