park mein

chup khaḌe daraḳht se

mere shāne chhūte hue

ḳhushk patte girte haiñ

be-nūr dhuup aur be-rang mausam

ruk ruk kar chaltī havā

har shai udaas hai

zamīn āsmān manzar sab

baa.eñ jānib

koltār kī

vo saḌak hai

jo sabz-o-siyāh daraḳhtoñ

kī qatār ke darmiyān

duur tak

bal khātī

chalī ga.ī hai

daa.eñ jānib

navāb kī purānī havelī

jis meñ

ab market hai

sāmne

fence ke us paar

schōl kī imārat

jis ke gate par

māltī kī bel ke zer-e-sāya

ek giit hai

giit

jo milne aur bichhaḌne

rone aur gaane

jiine aur ġham uThāne

ke baare meñ hai

giit

jo faqat bichhaḌne ke liye milne

faqat rone ke liye gaane

aur faqat ġham uThāne ke liye jiine

ke baare meñ hai

giit

jo

zindagī masarratoñ kā

kaisā be-rahm chhalāvā hai

tāham gila

ki ye itnī muḳhtasar hai

udaas dopahar

suune park kī bad-rañg bench par

kab se baiThā huuñ

fazā meñ ek giit kī

bāzgasht suntā huā

shaad

nāshād

chup khaDe daraKHt se

mere shane chhute hue

KHushk patte girte hain

be-nur dhup aur be-rang mausam

ruk ruk kar chalti hawa

har shai udas hai

zamin aasman manzar sab

baen jaanib

koltar ki

wo saDak hai

jo sabz-o-siyah daraKHton

ki qatar ke darmiyan

dur tak

bal khati

chali gai hai

daen jaanib

nawab ki purani haweli

jis mein

ab market hai

samne

fence ke us par

school ki imarat

jis ke gate par

malti ki bel ke zer-e-saya

ek git hai

git

jo milne aur bichhaDne

rone aur gane

jine aur gham uThane

ke bare mein hai

git

jo faqat bichhaDne ke liye milne

faqat rone ke liye gane

aur faqat gham uThane ke liye jine

ke bare mein hai

git

jo

zindagi masarraton ka

kaisa be-rahm chhalawa hai

taham gila

ki ye itni muKHtasar hai

udas dopahar

sune park ki bad-rang bench par

kab se baiTha hun

faza mein ek git ki

bazgasht sunta hua

shad

nashad