pas che-bayad-kard

ḳhvāb-e-ḳhas-ḳhāna-o-barfāb ke pīchhe pīchhe

garmi-e-shahr-e-muqaddar ke satā.e hue log

kaisī yaḳh-basta zamīnoñ kī taraf aa nikle

mauj-e-ḳhūñ barf huī jaatī hai sāñseñ bhī haiñ barf

vahshateñ jin kā muqaddar thiiñ vo āñkheñ bhī haiñ barf

yād-e-yārān-e-dil-āvez kā manzar bhī hai barf

ek ik naam har āvāz har ik chehra barf

munjamid ḳhvāb kī Tiksāl kā har sikka barf

aur ab sochte haiñ shām-o-sahar sochte haiñ

ḳhvāb-e-ḳhas-ḳhāna-o-barfāb se vo aag bhalī

jin ke sho.aloñ meñ bhī qirtās o qalam zinda haiñ

jis meñ har ahd ke har nasl ke ġham zinda haiñ

ḳhaak ho kar bhī ye lagtā thā ki ham zinda haiñ

KHwab-e-KHas-KHana-o-barfab ke pichhe pichhe

garmi-e-shahr-e-muqaddar ke satae hue log

kaisi yaKH-basta zaminon ki taraf aa nikle

mauj-e-KHun barf hui jati hai sansen bhi hain barf

wahshaten jin ka muqaddar thin wo aankhen bhi hain barf

yaad-e-yaran-e-dil-awez ka manzar bhi hai barf

ek ek nam har aawaz har ek chehra barf

munjamid KHwab ki Tiksal ka har sikka barf

aur ab sochte hain sham-o-sahar sochte hain

KHwab-e-KHas-KHana-o-barfab se wo aag bhali

jin ke shoalon mein bhi qirtas o qalam zinda hain

jis mein har ahd ke har nasl ke gham zinda hain

KHak ho kar bhi ye lagta tha ki hum zinda hain