پس خیال

کوئی خواب تھا یا خیال تھا

وہ دل و نظر کا ملال تھا

تھے اسی کے دم سے یہ فاصلے

وہی قرب‌‌ جاں سے نہال تھا

وہی ضو فشاں تھا سخن سخن

وہی فکر و فن کا کمال تھا

تھیں اسی کے نام بلندیاں

وہی آپ اپنی مثال تھا

وہ شعاع مہر یقیں بنا

وہی اضطراب زمیں بنا

میرے سر پہ سایہ فگن ہوا

وہی اعتبار کا دیں بنا

مرے واسطے مرے نام پر

وہی روشنی کی جبیں بنا

جسے لکھ سکوں میں ہواؤں پر

وہ غزل کا سوز مبیں بنا

تھا وہ ابر باراں حیات کا

وہ مہ درخشاں حیات کا

وہ ملا تو ایسا لگا مجھے

کہ وہی ہے عنواں حیات کا

مری آرزوؤں کا سلسلہ

تھا وہی تو ساماں حیات کا

ہوئی روح زندہ وجود کی

ہوا جسم تاباں حیات کا

مگر اب جو بکھری صداقتیں

بنی خواب ساری حقیقتیں

کوئی نقش یاس بجھا ہوا

کہیں سرفراز روایتیں

مرا اعتبار نہ چھو سکا

ترے التفات کی راحتیں

جو مرے یقیں کا لباس تھیں

ہوئیں بے حصار وہ لذتیں

وہ گیا تو ایسا گیا کہ پھر

نہ پلٹ کے آیا مری طرف

نہ ہی اس نے سوچا کبھی مجھے

نہ ہی سر جھکایا مری طرف

وہ لطیف جھونکا بہار کا

جو نہ دیکھ پایا مری طرف

مرے دل کے ارماں بکھر گئے

وہ کبھی تو آتا مری طرف

یہ گماں ہی میرا یقیں ہے

کہ کہیں بھی روح کا گھر نہیں

مرے روز و شب کے دیار میں

کہیں روشنی کا گزر نہیں

ہے اداس چاند بجھا بجھا

کوئی حرف حرف گہر نہیں

اسے اپنا میں نے سمجھ لیا

وہ جہاں میں اپنا مگر نہیں