پس پردہ

زباں ہلی کہ گرا سر پہ جھولتا خنجر

معاف ہو نہ سکے گی خطائے شوخ لبی

سلامتی ہے اسی میں کہ بے ادب نہ بنو

بڑے جتن سے یہ محفل سجائی جاتی ہے

اک ایک بھید کی قیمت چکائی جاتی ہے

ردائیں سرکیں گی پگھلے گا چلمنوں کا جلال

نہ جانے سامنے آئیں گی کتنی تصویریں

سلگتی حیرتیں چٹخیں گی آئنوں کی طرح

جو دیکھنا اسے پلکوں میں دفن کر دینا

بڑھے حدود نظر سے نہ کاروان خیال

ہے جرم با خبری اک عذاب سے بھی سوا

یہ جان بھی نہ سکو گے کدھر سے تیر آیا

بساط شاخ پہ ان کو قرار کیا آئے

بہار اور ہے ان کی نمو ہے اور ان کا

یہ جسم کھلتے ہیں زرکار بازوؤں کے لئے

چٹک کی گونج ہے رسوائے صوت و رنگ مگر

زباں ہلی کہ گرا سر پہ جھولتا خنجر