پشیمانی

وہ کہتی ہے مرا پھر سے یقیں کر لو

زمانہ دیکھ آئی ہوں

ترے جیسا نہیں ملتا

میں کہتا ہوں

زمیں بنجر جو ہو جائے

کرو تم لاکھ سیرابی

وہاں پر کچھ نہیں کھلتا

پیار اک بار ہوتا ہے

فقط اک بار ہوتا ہے

اگر تم چھوڑ جاؤ تو

دوبارہ لوٹ آؤ تو

نہ پہلی بات رہتی ہے

نہ پھر وہ ذات رہتی ہے

سنو جاناں

میں تم کو دیکھتا تو ہوں

دکھائی کچھ نہیں دیتا

میں تم کو سوچتا بھی ہوں

سجھائی کچھ نہیں دیتا

بہت کچھ بولتی ہو اب

سنائی کچھ نہیں دیتا

کسی کو چھوڑ جانے سے

کسی کا دل دکھانے سے

کبھی محسوس تم کر لو

عذاب جاں ہے پل پل وہ

سکوں اک پل نہیں ملتا

جدائی زخم ایسا ہے

جو روح دل پہ لگ جائے

میں کیسے تم کو سمجھاؤں

نہیں سلتا نہیں سلتا نہیں سلتا

وہ کہتی ہے مرا پھر سے یقیں کر لو

زمانہ دیکھ آئی ہوں ترے جیسا نہیں ملتا