pata nahin wo kaun tha

pata nahīñ vo kaun thā

jo mere haath

mūgre kī Daal pañkh mor kā thamā ke chal diyā

pata nahīñ vo kaun thā

havā ke jhoñke kī tarah jo aayā aur guzar gayā

nazar ko rañg dil ko nik.hatoñ ke dukh se bhar gayā

maiñ kaun huuñ

guzarne vaalā kaun thā

ye phuul pañkh kyā haiñ kyuuñ mile

ye sochte hī sochte tamām rañg ek rañg meñ utarte ga.e

......siyāh rañg

tamām nik.hateñ idhar udhar bikhar ga.iiñ

.........ḳhalāoñ meñ

yaqīn hai...... nahīñ nahīñ gumān hai

vo koī merā dushman-e-qadīm thā

dikhā ke jo sarāb merī pyaas aur baḌhā gayā

maiñ be-hisāb ārzūoñ kā shikār

intihā-e-shauq meñ fareb us kā khā gayā

gumān... nahīñ nahīñ yaqīn hai

vo koī merā dost thā

jo do ghaḌī ke vāste hī kyuuñ na ho

nazar ko rañg dil ko nik.hatoñ se bhar gayā

pata nahīñ kidhar gayā

maiñ is ko DhūñDhtā huā

tamām kā.enāt meñ

udhar udhar bikhar gayā

pata nahin wo kaun tha

jo mere hath

mugre ki Dal pankh mor ka thama ke chal diya

pata nahin wo kaun tha

hawa ke jhonke ki tarah jo aaya aur guzar gaya

nazar ko rang dil ko nikhaton ke dukh se bhar gaya

main kaun hun

guzarne wala kaun tha

ye phul pankh kya hain kyun mile

ye sochte hi sochte tamam rang ek rang mein utarte gae

siyah rang

tamam nikhaten idhar udhar bikhar gain

KHalaon mein

yaqin hai nahin nahin guman hai

wo koi mera dushman-e-qadim tha

dikha ke jo sarab meri pyas aur baDha gaya

main be-hisab aarzuon ka shikar

intiha-e-shauq mein fareb us ka kha gaya

guman nahin nahin yaqin hai

wo koi mera dost tha

jo do ghaDi ke waste hi kyun na ho

nazar ko rang dil ko nikhaton se bhar gaya

pata nahin kidhar gaya

main is ko DhunDhta hua

tamam kaenat mein

udhar udhar bikhar gaya