pathraw

dard thamtā bhī nahīñ

had se guzartā bhī nahīñ

bhuul kar tujh ko ajab haal huā hai dil kā

sāl-hā-sāl se dil

mundamil hotā huā ghaav hai

Dūbtī hai koī hasrat na ubhartī hai umiid

bahr-e-ālām meñ tūfāñ hai na Thahrāv hai

ufuq-e-zīst pe tal.at hai na tārīkī hai

duur tak dhund kā mauhūm sā kajrāo hai

sāhil-e-chashm pe taare haiñ na motī haiñ na ashk

soch kā haath hai ehsās kā pathrāv hai

Dūbtī bhī nahīñ sīdhī bhī nahīñ hotī hai

umr kī lahr pe jaañ ulTī huī naav hai

taḳhtiyāñ jis kī tire pyaar se paivasta haiñ

bādbāñ jis kā mire saañs kā phailāv hai

saañs ruktā bhī nahīñ

Thiik se chaltā bhī nahīñ

bhuul kar tujh ko ajab haal hai dil kā

dard thamta bhi nahin

had se guzarta bhi nahin

bhul kar tujh ko ajab haal hua hai dil ka

sal-ha-sal se dil

mundamil hota hua ghaw hai

Dubti hai koi hasrat na ubharti hai umid

bahr-e-alam mein tufan hai na Thahraw hai

ufuq-e-zist pe talat hai na tariki hai

dur tak dhund ka mauhum sa kajrao hai

sahil-e-chashm pe tare hain na moti hain na ashk

soch ka hath hai ehsas ka pathraw hai

Dubti bhi nahin sidhi bhi nahin hoti hai

umr ki lahr pe jaan ulTi hui naw hai

taKHtiyan jis ki tere pyar se paiwasta hain

baadban jis ka mere sans ka phailaw hai

sans rukta bhi nahin

Thik se chalta bhi nahin

bhul kar tujh ko ajab haal hai dil ka