pathraw ki chaumukh barkha mein

maiñ zaḳhmī zaḳhmī lahū lahū

har jañgal har ābādī meñ

kāñToñ ke nukīle rastoñ par

phūloñ kī rū-pahlī vaadī meñ

har shahr meñ har vīrāne meñ

koī to ḳharīdār aa.egā

maqtal kī sunahrī chaukhaT tak

bismil kā taraf-dār aa.egā

ik aas liye ummīd liye

dāman meñ mah-o-ḳhurshīd liye

pathrāv kī chaumukh barkhā meñ

ḳhvāboñ ko bachātā phirtā huuñ

be-rahm haqīqat miltī hai

maiñ aañkh churātā phirtā huuñ

*

aksar ye tamannā jaagī hai

goyā maiñ chahaktā bālak huuñ

titlī ke rañgīñ pañkhoñ par

lalchā.e hue ban ban ghūmūñ

har kunj meñ ḳhushbū pī pī kar

ganjār meñ bhauñroñ kī jhūmūñ

har bhūre bha.e har sāñjh bha.e

chahkār meñ chiḌiyoñ kī dolūñ

fitrat sā saḳhī to koī nahīñ

nazroñ sā dhanī to koī nahīñ

ye peḌ ye parbat ye sāgar

dhartī pe khilaune rakhe haiñ

ye dariyā parteñ chāñdī kī

amrit ke done rakkhe haiñ

maiñ amrit piine ruktā huuñ

dariyā ke taT par chhā.īñ

phunkārtī hai Das jaatī hai

ḳhvāboñ se mujhe chauñkātī hai

aksar ye gumāñ hotā hai mujhe

maiñ ek chamaktā jugnūñ huuñ

shabnam kī nannhī būñdoñ ko

phūloñ kā ghar dikhlātā huuñ

maiñ shab ke añdhere siine meñ

nekī kī kiran ban jaatā huuñ

jab pau kī raushnī aatī hai

phunkārtī hai Das jaatī hai

ḳhvāboñ se mujhe chauñkātī hai

*

aksar ye gumāñ hotā hai mujhe

but-sāz huuñ maiñ har patthar se

derīna-shanāsā.ī hai mirī

chalātā hai koī andar se

har sañkh meñ ik but-ḳhāna hai

jis shai ko patthar kahte haiñ

vo sūrat kā bai.āna hai

har sañg se phir but Dhalte haiñ

har but ko zabāñ mil jaatī hai

maiñ pahroñ un kī suntā huuñ

ḳhush hotā huuñ sar dhuntā huuñ

duniyā ko magar fursat hī kahāñ

āvāz mirī ghaT jaatī hai

ḳhvāboñ se mujhe chauñkātī hai

*

dānāoñ kī is nagrī meñ

ye bahkī bahkī kaun sune

sar chīḳh kī phāñsī par ho jahāñ

sar ḳhāmoshī par kaun dhune

maiñ kisī bastī kā baasī huuñ

kyā kahtā huuñ kyā suntā huuñ

in gītoñ ke khaliyānoñ se

kyuuñ motī motī chintā huuñ

pathrāv kī chaumukh barkhā meñ

har motī TūTtā jaatā hai

ḳhvāboñ se mujhe chauñkātā hai

main zaKHmi zaKHmi lahu lahu

har jangal har aabaadi mein

kanTon ke nukile raston par

phulon ki ru-pahli wadi mein

har shahr mein har virane mein

koi to KHaridar aaega

maqtal ki sunahri chaukhaT tak

bismil ka taraf-dar aaega

ek aas liye ummid liye

daman mein mah-o-KHurshid liye

pathraw ki chaumukh barkha mein

KHwabon ko bachata phirta hun

be-rahm haqiqat milti hai

main aankh churaata phirta hun

*

aksar ye tamanna jagi hai

goya main chahakta baalak hun

titli ke rangin pankhon par

lalchae hue ban ban ghumun

har kunj mein KHushbu pi pi kar

ganjar mein bhaunron ki jhumun

har bhure bhae har sanjh bhae

chahkar mein chiDiyon ki dolun

fitrat sa saKHi to koi nahin

nazron sa dhani to koi nahin

ye peD ye parbat ye sagar

dharti pe khilaune rakhe hain

ye dariya parten chandi ki

amrit ke done rakkhe hain

main amrit pine rukta hun

dariya ke taT par chhain

phunkarti hai Das jati hai

KHwabon se mujhe chaunkati hai

aksar ye guman hota hai mujhe

main ek chamakta jugnun hun

shabnam ki nannhi bundon ko

phulon ka ghar dikhlata hun

main shab ke andhere sine mein

neki ki kiran ban jata hun

jab pau ki raushni aati hai

phunkarti hai Das jati hai

KHwabon se mujhe chaunkati hai

*

aksar ye guman hota hai mujhe

but-saz hun main har patthar se

derina-shanasai hai meri

chalata hai koi andar se

har sankh mein ek but-KHana hai

jis shai ko patthar kahte hain

wo surat ka baiana hai

har sang se phir but Dhalte hain

har but ko zaban mil jati hai

main pahron un ki sunta hun

KHush hota hun sar dhunta hun

duniya ko magar fursat hi kahan

aawaz meri ghaT jati hai

KHwabon se mujhe chaunkati hai

*

danaon ki is nagri mein

ye bahki bahki kaun sune

sar chiKH ki phansi par ho jahan

sar KHamoshi par kaun dhune

main kisi basti ka basi hun

kya kahta hun kya sunta hun

in giton ke khaliyanon se

kyun moti moti chinta hun

pathraw ki chaumukh barkha mein

har moti TuTta jata hai

KHwabon se mujhe chaunkata hai