پتے پر لکھی کہانی

اگر میری آنکھیں مجھے دھوکا نہیں دے رہیں

تو اس پتے پر ایک کہانی لکھی ہوئی ہے

میرے دوستوں کا مشورہ ہے

مجھے کسی آئی سپیشلسٹ کو کنسلٹ کرنا چاہئے

میرا خیال ہے

لوگ کہانی کہنا سننا بھول چکے ہیں

اب گھر سے صحن اور صحنوں سے گلاب رخصت ہو گئے ہیں

آسمان کے کھیت میں ستارے نہیں اگتے

میرے دوستوں کو پتے پر لکھی کہانی نظر نہیں آتی

لگتا ہے یہ کہانی

کسی قدیم زبان میں لکھی ہوئی ہے

اور زبانوں سے ہمارا تعلق

محض لسانی فسادات کی حد تک باقی رہ گیا ہے