patthar

maiñ ik ma.asūm shahrī thā

sharāfat se sabhī ke saath rahtā thā

mohazzab taur se jiitā thā

sab ke kaam aatā thā

kabhī maiñ ne kisī kā dil nahīñ toḌā

kisī kā sar nahīñ phoḌā

kisī tarkash se koī tiir kyā tinkā nahīñ chhoḌā

kisī kī piiTh meñ ḳhanjar nahīñ bhoñkā

kisī ke jism par bārūd kā golā nahīñ pheñkā

kisī ko aag meñ maiñ ne nahīñ jhoñkā

kisī kā haq nahīñ maarā

kisī kā zar nahīñ luuTā

koī ḳhirman nahīñ phūñkā

kisī building kisī gaaḌī kisī mahfil meñ koī bam nahīñ rakkhā

mire hāthoñ kisī kā ghar nahīñ ujḌā

kisī kā dar nahīñ ukhḌā

koī kumba nahīñ bikhrā

koī māthā nahīñ sikuḌā

kisī kī raah meñ roḌā nahīñ aTkā

kisī ke kaam meñ maiñ ne kabhī raḳhna nahīñ Daalā

kisī ke vāste dil meñ kabhī kiina nahīñ paalā

koī farmān hākim kā kabhī maiñ ne nahīñ Taalā

koī gherā nahīñ lāñghā

koī āñgan nahīñ phāñdā

magar phir bhī qayāmat mujh pe TuuTī hai

ajab ġhārat-garī kā qahr barsā hai

ajab saffāk ḳhanjar dil meñ utrā hai

ki merī ruuh ab tak tilmilātī hai

ki merā zehn ab bhī jhunjhunātā hai

ki merī saañs ab bhī laḌkhaḌātī hai

samajh meñ kuchh nahīñ aatā

ki maiñ ne kyā bigāḌā hai

mire kis jurm kī mujh ko milī hai

ye sazā āḳhir

ye gutthī kis tarah kholūñ

sabab kis se yahāñ pūchhūñ

kidhar jā.ūñ

kise rokūñ

sabhī chehre yahāñ patthar

sabhī āñkheñ yahāñ patthar

basārat meñ bharā patthar

samā.at meñ basā patthar

zabānoñ meñ gaḌā patthar

adālat meñ khaḌā patthar

har ik qānūn meñ patthar

har ik aa.iin meñ patthar

har ik insāf meñ patthar

har ik āvāz meñ patthar

har ik ehsās meñ patthar

ye patthar yug ke patthar se bhī bhārī hai

nagīne kī tarah tarshā huā hai

aur hiire kī anī kī tarah us kī tez nokeñ haiñ

bahut shaffāf hai ye aur is meñ ik tamaddun hai

maiñ is patthar se sar phoḌūñ

ki apnī zindagī chhoḌūñ

ki apnā rāsta moḌūñ

ki ban jā.ūñ maiñ ḳhud patthar

samajh meñ kuchh nahīñ aatā

main ek masum shahri tha

sharafat se sabhi ke sath rahta tha

mohazzab taur se jita tha

sab ke kaam aata tha

kabhi main ne kisi ka dil nahin toDa

kisi ka sar nahin phoDa

kisi tarkash se koi tir kya tinka nahin chhoDa

kisi ki piTh mein KHanjar nahin bhonka

kisi ke jism par barud ka gola nahin phenka

kisi ko aag mein main ne nahin jhonka

kisi ka haq nahin mara

kisi ka zar nahin luTa

koi KHirman nahin phunka

kisi building kisi gaDi kisi mahfil mein koi bam nahin rakkha

mere hathon kisi ka ghar nahin ujDa

kisi ka dar nahin ukhDa

koi kumba nahin bikhra

koi matha nahin sikuDa

kisi ki rah mein roDa nahin aTka

kisi ke kaam mein main ne kabhi raKHna nahin Dala

kisi ke waste dil mein kabhi kina nahin pala

koi farman hakim ka kabhi main ne nahin Tala

koi ghera nahin langha

koi aangan nahin phanda

magar phir bhi qayamat mujh pe TuTi hai

ajab ghaarat-gari ka qahr barsa hai

ajab saffak KHanjar dil mein utra hai

ki meri ruh ab tak tilmilati hai

ki mera zehn ab bhi jhunjhunata hai

ki meri sans ab bhi laDkhaDati hai

samajh mein kuchh nahin aata

ki main ne kya bigaDa hai

mere kis jurm ki mujh ko mili hai

ye saza aaKHir

ye gutthi kis tarah kholun

sabab kis se yahan puchhun

kidhar jaun

kise rokun

sabhi chehre yahan patthar

sabhi aankhen yahan patthar

basarat mein bhara patthar

samaat mein basa patthar

zabanon mein gaDa patthar

adalat mein khaDa patthar

har ek qanun mein patthar

har ek aain mein patthar

har ek insaf mein patthar

har ek aawaz mein patthar

har ek ehsas mein patthar

ye patthar yug ke patthar se bhi bhaari hai

nagine ki tarah tarsha hua hai

aur hire ki ani ki tarah us ki tez noken hain

bahut shaffaf hai ye aur is mein ek tamaddun hai

main is patthar se sar phoDun

ki apni zindagi chhoDun

ki apna rasta moDun

ki ban jaun main KHud patthar

samajh mein kuchh nahin aata