patthar

ret se but na banā ai mire achchhe fankār

ek lamhe ko Thahar maiñ tujhe patthar lā duuñ

maiñ tire sāmne ambār lagā duuñ lekin

kaun se rañg kā patthar tire kaam aa.egā

surḳh patthar jise dil kahtī hai be-dil duniyā

yā vo pathrā.ī huī aañkh kā niilā patthar

jis meñ sadiyoñ ke tahayyur ke paḌe hoñ Dore

kyā tujhe ruuh ke patthar kī zarūrat hogī

jis pe haq baat bhī patthar kī tarah girtī hai

ik vo patthar hai jo kahlātā hai tahzīb-e-safed

us ke marmar meñ siyah ḳhuun jhalak jaatā hai

ek insāf kā patthar bhī to hotā hai magar

haath meñ tesha-e-zar ho to vo haath aatā hai

jitne meyār haiñ is daur ke sab patthar haiñ

jitnī aqdār haiñ is daur kī sab patthar haiñ

sabza o gul bhī havā aur fazā bhī patthar

merā ilhām tirā zehn-e-rasā bhī patthar

is zamāne meñ to har fan kā nishāñ patthar hai

haath patthar haiñ tire merī zabāñ patthar hai

ret se but na banā ai mire achchhe fankār

ret se but na bana ai mere achchhe fankar

ek lamhe ko Thahar main tujhe patthar la dun

main tere samne ambar laga dun lekin

kaun se rang ka patthar tere kaam aaega

surKH patthar jise dil kahti hai be-dil duniya

ya wo pathrai hui aankh ka nila patthar

jis mein sadiyon ke tahayyur ke paDe hon Dore

kya tujhe ruh ke patthar ki zarurat hogi

jis pe haq baat bhi patthar ki tarah girti hai

ek wo patthar hai jo kahlata hai tahzib-e-safed

us ke marmar mein siyah KHun jhalak jata hai

ek insaf ka patthar bhi to hota hai magar

hath mein tesha-e-zar ho to wo hath aata hai

jitne meyar hain is daur ke sab patthar hain

jitni aqdar hain is daur ki sab patthar hain

sabza o gul bhi hawa aur faza bhi patthar

mera ilham tera zehn-e-rasa bhi patthar

is zamane mein to har fan ka nishan patthar hai

hath patthar hain tere meri zaban patthar hai

ret se but na bana ai mere achchhe fankar