payam-e-watan

rāhat tire hī dars se paatā hai kul-jahāñ

sar terī azmatoñ pe jhukātā hai āsmāñ

gūñjā yahīñ se amn-o-amāñ kā payām hai

is vāste jahāñ meñ tirā ehtirām hai

jo terī mahfiloñ se uThī vo sadā hai ye

duniyā bane bahisht tirā mudda.ā hai ye

fitne kā shar kā buġhz-o-hasad kā ġhanīm hai

tū bhī aziim qaum bhī terī aziim hai

aalam ba-sad-ḳhulūs jhukā.e na kyoñ jabīñ

tahzīb-o-ilm-o-fan kā hai gahvāra-e-hasīñ

sho.aloñ ko sard karne ke sāmāñ kiye hue

sab ahl-e-dil haiñ ek hī jazba liye hue

paiġhām hai ki ātish-e-nafrat meñ mat jalo

zulmat meñ sham.a-e-uns farozāñ kiye chalo

har-dam baqā-e-dahr pe chashm-e-bashar rahe

māzī-o-hāl-o-fardā pe gahrī nazar rahe

dil dil se multafit ho mohabbat do-chand ho

insān kā vaqār jahāñ meñ buland ho

dar dar kī ḳhaak koī kahīñ chhāntā na ho

ġhurbat hai chiiz kyā ye koī jāntā na ho

chehre pe rang aa.e ye ġhuncha khilā rahe

gulshan hayāt-e-insāñ kā phūlā phulā rahe

āgāh mā-o-tū se kisī kī zabāñ na ho

tafrīq-e-rang-o-nasl kā nām-o-nishāñ na ho

duniyā se duur jang-o-jadal kā dhuāñ rahe

ghar meñ galī meñ gaañv meñ amn-o-amāñ rahe

raushan 'jamāl' dahr meñ bhārat kā naam hai

har lab pe aaj mere vatan kā payām hai

rahat tere hi dars se pata hai kul-jahan

sar teri azmaton pe jhukata hai aasman

gunja yahin se amn-o-aman ka payam hai

is waste jahan mein tera ehtiram hai

jo teri mahfilon se uThi wo sada hai ye

duniya bane bahisht tera muddaa hai ye

fitne ka shar ka bughz-o-hasad ka ghanim hai

tu bhi azim qaum bhi teri azim hai

aalam ba-sad-KHulus jhukae na kyon jabin

tahzib-o-ilm-o-fan ka hai gahwara-e-hasin

shoalon ko sard karne ke saman kiye hue

sab ahl-e-dil hain ek hi jazba liye hue

paigham hai ki aatish-e-nafrat mein mat jalo

zulmat mein shama-e-uns farozan kiye chalo

har-dam baqa-e-dahr pe chashm-e-bashar rahe

mazi-o-haal-o-farda pe gahri nazar rahe

dil dil se multafit ho mohabbat do-chand ho

insan ka waqar jahan mein buland ho

dar dar ki KHak koi kahin chhanta na ho

ghurbat hai chiz kya ye koi jaanta na ho

chehre pe rang aae ye ghuncha khila rahe

gulshan hayat-e-insan ka phula phula rahe

aagah ma-o-tu se kisi ki zaban na ho

tafriq-e-rang-o-nasl ka nam-o-nishan na ho

duniya se dur jang-o-jadal ka dhuan rahe

ghar mein gali mein ganw mein amn-o-aman rahe

raushan 'jamal' dahr mein bhaarat ka nam hai

har lab pe aaj mere watan ka payam hai