payam

hindū ko rām-rām musalmān ko salām

sab ke liye hai merā mohabbat-bharā payām

pesha hai merā chāk-e-jigar kī rafū-garī

ukhḌe hue diloñ kī marammat hai merā kaam

bandoñ se bad-sulūkī hai merī nazar meñ jurm

nafrat kisī se merī sharī.at meñ hai harām

nisbat hai mai-kade se ziyāda bhale mujhe

dair-o-haram kā bhī hai barābar hī ehtirām

ulfat butoñ se aur aqīdat ḳhudā se hai

hai darmiyān-e-kāfir-o-momin mirā maqām

ḳhvāhish nahīñ hai qurbat-e-masnad kī kuchh mujhe

jamhūr kī hai sirf amānat mirā kalām

suntā huuñ ġhaur se maiñ nasīhat sabhī kī par

merā zamīr hī hai mirā rahbar-o-imām

zor-e-sitam ke aage jhukā.ūñ na sar kabhī

aa.e jo pesh pyaar se us kā huuñ maiñ ġhulām

hindu ko ram-ram musalman ko salam

sab ke liye hai mera mohabbat-bhara payam

pesha hai mera chaak-e-jigar ki rafu-gari

ukhDe hue dilon ki marammat hai mera kaam

bandon se bad-suluki hai meri nazar mein jurm

nafrat kisi se meri shariat mein hai haram

nisbat hai mai-kade se ziyaada bhale mujhe

dair-o-haram ka bhi hai barabar hi ehtiram

ulfat buton se aur aqidat KHuda se hai

hai darmiyan-e-kafir-o-momin mera maqam

KHwahish nahin hai qurbat-e-masnad ki kuchh mujhe

jamhur ki hai sirf amanat mera kalam

sunta hun ghaur se main nasihat sabhi ki par

mera zamir hi hai mera rahbar-o-imam

zor-e-sitam ke aage jhukaun na sar kabhi

aae jo pesh pyar se us ka hun main ghulam