pech-o-tab

phir tasavvur khā rahā hai pech-o-tāb

phir vahī haijān-o-harkat karb-o-dard-o-iztirāb

phir vahī dhuñdle nuqush-e-māh-o-sāl

phir vahī sub.h-e-bahārāñ phir vahī shām-e-visāl

phir vahī biite hue lamhoñ kī yaad

phir vahī maujeñ vahī kashtī vahī bād-e-murād

phir vahī raqs-e-sharār-e-zindagī

phir vahī husn-e-latāfat-rez kī tābindagī

phir vahī va.adoñ pe lutf-e-intizār

phir vahī chashm-e-suḳhan-go ke ishāre bār-bār

phir vahī dard-e-musalsal kī kasak

phir vahī mauj-e-tabassum-hā-e-pinhāñ kī jhalak

phir vahī aish-o-tarab kā ehtimām

phir vahī bazm-e-tamannā phir vahī sāqī-o-jām

phir vahī āġhāz-e-ulfat kā surūr

phir vahī yādoñ ke saa.e zehn meñ nazdīk-o-dūr

phir vahī shorish vahī josh-o-ḳharosh

phir kahīñ dīvāngī taarī na ho ai dil ḳhamosh

phir tasawwur kha raha hai pech-o-tab

phir wahi haijaan-o-harkat karb-o-dard-o-iztirab

phir wahi dhundle nuqush-e-mah-o-sal

phir wahi subh-e-bahaaran phir wahi sham-e-visal

phir wahi bite hue lamhon ki yaad

phir wahi maujen wahi kashti wahi baad-e-murad

phir wahi raqs-e-sharar-e-zindagi

phir wahi husn-e-latafat-rez ki tabindagi

phir wahi wadon pe lutf-e-intizar

phir wahi chashm-e-suKHan-go ke ishaare bar-bar

phir wahi dard-e-musalsal ki kasak

phir wahi mauj-e-tabassum-ha-e-pinhan ki jhalak

phir wahi aish-o-tarab ka ehtimam

phir wahi bazm-e-tamanna phir wahi saqi-o-jam

phir wahi aaghaz-e-ulfat ka surur

phir wahi yaadon ke sae zehn mein nazdik-o-dur

phir wahi shorish wahi josh-o-KHarosh

phir kahin diwangi tari na ho ai dil KHamosh