pesh-ahang

junūn-e-shauq ke dam se hai izz-o-shān-e-hayāt

yahī hai rūh-e-mohabbat yahī hai jān-e-hayāt

qiyām naam hai kis kā ise nahīñ ma.alūm

hamesha garm-e-tag-o-dau hai kārvān-e-hayāt

ziyā-e-ishq se qalb-o-nigāh raushan ho

to ḳhud-baḳhud nikhar aatī hai dāstān-e-hayāt

ġham-e-hayāt ko hañs hañs ke jo uThātā hai

usī ko miltā hai yaañ lutf-e-jāvidān-e-hayāt

jo tū sune to kahūñ ek baat nukte kī

ḳhudī se baḌh ke nahīñ koī pāsbān-e-hayāt

ḳhudī se tū ne agar rishta ustuvār kiyā

ajal miTā nahīñ saktī tirā nishān-e-hayāt

milā hai hazrat-e-iqbāl se use āhang

huā hai 'manshā' tabhī aisā naġhma-ḳhvān-e-hayāt

junun-e-shauq ke dam se hai izz-o-shan-e-hayat

yahi hai ruh-e-mohabbat yahi hai jaan-e-hayat

qiyam nam hai kis ka ise nahin malum

hamesha garm-e-tag-o-dau hai karwan-e-hayat

ziya-e-ishq se qalb-o-nigah raushan ho

to KHud-baKHud nikhar aati hai dastan-e-hayat

gham-e-hayat ko hans hans ke jo uThata hai

usi ko milta hai yan lutf-e-jawidan-e-hayat

jo tu sune to kahun ek baat nukte ki

KHudi se baDh ke nahin koi pasban-e-hayat

KHudi se tu ne agar rishta ustuwar kiya

ajal miTa nahin sakti tera nishan-e-hayat

mila hai hazrat-e-iqbaal se use aahang

hua hai 'mansha' tabhi aisa naghma-KHwan-e-hayat