پیش آہنگ

جنون شوق کے دم سے ہے عز و شان حیات

یہی ہے روح محبت یہی ہے جان حیات

قیام نام ہے کس کا اسے نہیں معلوم

ہمیشہ گرم تگ و دو ہے کاروان حیات

ضیائے عشق سے قلب و نگاہ روشن ہو

تو خود بخود نکھر آتی ہے داستان حیات

غم حیات کو ہنس ہنس کے جو اٹھاتا ہے

اسی کو ملتا ہے یاں لطف جاودان حیات

جو تو سنے تو کہوں ایک بات نکتہ کی

خودی سے بڑھ کے نہیں کوئی پاسبان حیات

خودی سے تو نے اگر رشتہ استوار کیا

اجل مٹا نہیں سکتی ترا نشان حیات

ملا ہے حضرت اقبالؔ سے اسے آہنگ

ہوا ہے منشاؔ تبھی ایسا نغمہ خوان حیات