phagun

āñgan meñ ik shajar hai

dālān meñ havā.eñ

kamre meñ ek laḌkī

ujlī udaas laḌkī

water-color se dil pe patte banā rahī hai

itne meñ peḌ aayā

kamre meñ peḌ aayā

patte girā ke bolā ''bāhar havā bahut hai''

laḌkī thī pahle ujlī ab piilī ho ga.ī hai

phir chand pal biite dāḳhil huī havā.eñ

patte uḌā ke bolīñ andar havā bahut hai

laḌkī thī pahle piilī ab laal ho ga.ī hai

vo laal laal laḌkī ab be-qarār ho ke

water-color kā Dabbā dil meñ kahīñ chhupā.e

āñchal meñ kuchh havā.eñ dāman meñ chand patte

dālān se guzar ke āñgan ko paar kar ke

maidān-e-nauha-ḳhvāñ meñ aa ke ThiThak ga.ī hai

maidān-e-nauha-ḳhvāñ meñ ik canvas rakhā hai

is canvas ke dil pe water-color meñ bhīgā

phāgun kā har harā hai kab se vo jal rahā hai!

aangan mein ek shajar hai

dalan mein hawaen

kamre mein ek laDki

ujli udas laDki

water-color se dil pe patte bana rahi hai

itne mein peD aaya

kamre mein peD aaya

patte gira ke bola bahar hawa bahut hai

laDki thi pahle ujli ab pili ho gai hai

phir chand pal bite daKHil hui hawaen

patte uDa ke bolin andar hawa bahut hai

laDki thi pahle pili ab lal ho gai hai

wo lal lal laDki ab be-qarar ho ke

water-color ka Dabba dil mein kahin chhupae

aanchal mein kuchh hawaen daman mein chand patte

dalan se guzar ke aangan ko par kar ke

maidan-e-nauha-KHwan mein aa ke ThiThak gai hai

maidan-e-nauha-KHwan mein ek canwas rakha hai

is canwas ke dil pe water-color mein bhiga

phagun ka har hara hai kab se wo jal raha hai!