phansi ka mujrim

jaagā kiyā huuñ rāt-bhar

be-ḳhvāb āñkhoñ meñ basī thiiñ kitnī hī parchhā.iyāñ

jin ko na mil paayā badan

palkoñ pe jamte jaate the aañsū chaTānoñ kī tarah

jin ko tarāsho laakh koī mahal banñe kā nahīñ

ik aag kā ThanDā dhuāñ kyā jaane kitnī talḳhiyoñ kā rāz-dāñ

tanhā.iyoñ ke dosh pe bādal sā lahrātā rahā

ye khel bhī kyā khel thā

jaise koī letā ho mere bāzuoñ meñ muñh chhupā kar siskiyāñ

kahtā ho pahchāno zarā maiñ kaun huuñ kyā rabt hai tum se mirā

maiñ ye pahelī būjhne ko tā-sahar jaagā kiyā

thī raat bhārī kis qadar ye kyā kahūñ

jaise kisī maqtūl kī bālīñ pe muflis aqrabā chup ho ga.e hoñ rote rote der tak

rah rah simaTtī shab-gazīda rahguzar

ik sansanāte tiir sī

ḳhvāboñ ke phande kāTtī

āvāz pahre-dār kī

tārīkiyoñ kī vādī-e-ḳhāmosh meñ

is tarah lāThī ke Thahoke gūñjte

jaise lagātā ho koī phāñsī kā mujrim qahqahe

kyā maiñ bhī mujrim huuñ koī

kyā jaane kyā ho sā.atoñ kā faisla

ye kaun jaane daf.atan kab ThanDe bistar se uThūñ

dahlīz par aa jā.ūñ

aur us rahguzar par chal paḌūñ

varna ye lambī raat lambī aur bhī ho jā.egī

letā rahegā koī mere bāzuoñ meñ muñh chhupā kar siskiyāñ

maiñ us ko pahchānūñgā kyā

vo merā dukh jānegā kyā

jaga kiya hun raat-bhar

be-KHwab aankhon mein basi thin kitni hi parchhaiyan

jin ko na mil paya badan

palkon pe jamte jate the aansu chaTanon ki tarah

jin ko tarasho lakh koi mahal banne ka nahin

ek aag ka ThanDa dhuan kya jaane kitni talKHiyon ka raaz-dan

tanhaiyon ke dosh pe baadal sa lahraata raha

ye khel bhi kya khel tha

jaise koi leta ho mere bazuon mein munh chhupa kar siskiyan

kahta ho pahchano zara main kaun hun kya rabt hai tum se mera

main ye paheli bujhne ko ta-sahar jaga kiya

thi raat bhaari kis qadar ye kya kahun

jaise kisi maqtul ki baalin pe muflis aqraba chup ho gae hon rote rote der tak

rah rah simaTti shab-gazida rahguzar

ek sansanate tir si

KHwabon ke phande kaTti

aawaz pahre-dar ki

tarikiyon ki wadi-e-KHamosh mein

is tarah laThi ke Thahoke gunjte

jaise lagata ho koi phansi ka mujrim qahqahe

kya main bhi mujrim hun koi

kya jaane kya ho saaton ka faisla

ye kaun jaane dafatan kab ThanDe bistar se uThun

dahliz par aa jaun

aur us rahguzar par chal paDun

warna ye lambi raat lambi aur bhi ho jaegi

leta rahega koi mere bazuon mein munh chhupa kar siskiyan

main us ko pahchanunga kya

wo mera dukh jaanega kya