phenku ram

pheñkū raam ko ḳhuub aatā hai til ko taaḌ banānā

rassī ko vo saañp banā deñ aur zarre ko taarā

naam to un kā sevak raam thā ban ga.e pheñkū raam

un ke ġhalat tarīqoñ ne hī kiyā unheñ badnām

alif ko kahte lāThī lekin bante baḌe siyāne

har fan maulā kahlāte haiñ gaḌhte haiñ afsāne

gaañv meñ ik shab chor jo aa.e jaagā shor-sharāba

lāThiyāñ le kar ik ik jiyālā choroñ ke pīchhe bhāgā

pheñkū raam to Dar ke maare ghar se nikal na paa.e

shor-sharāba ḳhatm huā to hazrat bāhar aa.e

ghūm-ghām ke lauTe to thā haath meñ ek an.gochhā

use dikhā kar kahā ki jyuuñ hī chor ko maiñ ne pakḌā

bhāgā ḳhud ko chhuḌā ke lekin haath aayā ye an.gochhā

un kī lan-tarāniyoñ se the vāqif saare bhayyā

dekhā jā kar qarīb se vo raamū kā thā an.gochhā

gap-bāzī kā un ke dekhā logoñ ne anjām

hue na is par bhī sharminda bhaa.ī pheñkū raam

jis se izzat pe harf aa.e baaqī rahe na naam

pyāre bachcho kabhī na karnā tum sab aise kaam

phenku ram ko KHub aata hai til ko taD banana

rassi ko wo sanp bana den aur zarre ko tara

nam to un ka sewak ram tha ban gae phenku ram

un ke ghalat tariqon ne hi kiya unhen badnam

alif ko kahte laThi lekin bante baDe siyane

har fan maula kahlate hain gaDhte hain afsane

ganw mein ek shab chor jo aae jaga shor-sharaba

laThiyan le kar ek ek jiyala choron ke pichhe bhaga

phenku ram to Dar ke mare ghar se nikal na pae

shor-sharaba KHatm hua to hazrat bahar aae

ghum-gham ke lauTe to tha hath mein ek angochha

use dikha kar kaha ki jyun hi chor ko main ne pakDa

bhaga KHud ko chhuDa ke lekin hath aaya ye angochha

un ki lan-taraniyon se the waqif sare bhayya

dekha ja kar qarib se wo ramu ka tha angochha

gap-bazi ka un ke dekha logon ne anjam

hue na is par bhi sharminda bhai phenku ram

jis se izzat pe harf aae baqi rahe na nam

pyare bachcho kabhi na karna tum sab aise kaam