phir milna kya na milna kya

barsoñ ke ba.ad mileñ ham tum aur biitī ghaḌiyāñ ḳhvāb lageñ

nazroñ se milīñ nazreñ lekin darvāze diloñ ke band raheñ

bāñhoñ ko gale meñ Daal ke bhī milne kī taḌap baaqī hī rahe

be-tābī idhar be-mehrī udhar jab pyaar kī bāteñ baar lageñ

āñkhoñ se lage sāvan kī jhaḌī aur dil kī lagī kuchh aur baḌhe

jab siine se lag kar bhī un ke rūdād-e-judā.ī kah na sakeñ

jab haath meñ haath diye un ke dariyā ke kināre chalte raheñ

aur fāsle baḌhte baḌhte jab nadī ke kināre bin jaa.eñ

jab maazī guzrī raah bane biite lamhe bojhal yādeñ

jab ulfat haath male ro.e aur shikve gile bhī ḳhaar lageñ

ḳhvāboñ se ladī komal kaliyāñ jab mahke binā murjhā jaa.eñ

rut chāhat kī jab biit chuke phir milnā kyā nā milnā kyā

barson ke baad milen hum tum aur biti ghaDiyan KHwab lagen

nazron se milin nazren lekin darwaze dilon ke band rahen

banhon ko gale mein Dal ke bhi milne ki taDap baqi hi rahe

be-tabi idhar be-mehri udhar jab pyar ki baaten bar lagen

aankhon se lage sawan ki jhaDi aur dil ki lagi kuchh aur baDhe

jab sine se lag kar bhi un ke rudad-e-judai kah na saken

jab hath mein hath diye un ke dariya ke kinare chalte rahen

aur fasle baDhte baDhte jab nadi ke kinare bin jaen

jab mazi guzri rah bane bite lamhe bojhal yaaden

jab ulfat hath male roe aur shikwe gile bhi KHar lagen

KHwabon se ladi komal kaliyan jab mahke bina murjha jaen

rut chahat ki jab bit chuke phir milna kya na milna kya