phir uske baad ka arsa

phir us ke baa'd kā arsa

sunā ab tak yahī hai

jab zamīñ chakkī ke pāToñ kī tarah ghūme

madār-e-zāt kī atrāf meñ jab raqs kartī

ghuum kar apnī jagah pahuñche

to din takmīl paatā hai

magar maiñ aisī kaifiyyat meñ zinda huuñ

jahāñ takmīlliyat kī saarī tārīfeñ

zamānī gardishoñ ke sab tasavvur ḳhaam rahte haiñ

jahāñ shab kī siyāhī aur din kī rū-siyāhī meñ had-e-fāsil nahīñ hotī

ulūm-e-zāhirī mujh ko batāte haiñ

ba-zāhir gardish-e-shām-o-sahar meñ ek din aisā bhī aatā hai

jo baaqī sab dinoñ se kuchh tavālat khīñch letā hai

zavāl-e-vaqt se majbūr ho kar ek din aisā simaTtā hai

ki vaq.at meñ kisī bhī din kā ham-sar ho nahīñ saktā

magar maiñ ne kahā naañ

merī duniyā meñ zamānī gardishoñ ke sab tasavvur ḳhaam rahte haiñ

mirī duniyā kā sab se muḳhtasar din us kī qurbat kā zamāna hai

jo lauh-e-jāñ pe likkhā hai

phir us ke baa'd kā arsa tavālat hī tavālat hai

phir us ke ba'd ka arsa

suna ab tak yahi hai

jab zamin chakki ke paTon ki tarah ghume

madar-e-zat ki atraf mein jab raqs karti

ghum kar apni jagah pahunche

to din takmil pata hai

magar main aisi kaifiyyat mein zinda hun

jahan takmilliyat ki sari tarifen

zamani gardishon ke sab tasawwur KHam rahte hain

jahan shab ki siyahi aur din ki ru-siyahi mein had-e-fasil nahin hoti

ulum-e-zahiri mujh ko batate hain

ba-zahir gardish-e-sham-o-sahar mein ek din aisa bhi aata hai

jo baqi sab dinon se kuchh tawalat khinch leta hai

zawal-e-waqt se majbur ho kar ek din aisa simaTta hai

ki waqat mein kisi bhi din ka ham-sar ho nahin sakta

magar main ne kaha nan

meri duniya mein zamani gardishon ke sab tasawwur KHam rahte hain

meri duniya ka sab se muKHtasar din us ki qurbat ka zamana hai

jo lauh-e-jaan pe likkha hai

phir us ke ba'd ka arsa tawalat hi tawalat hai